Ramria thawk JCB-te hnuh kîr a ni ; Hna an zawh tawh vang a ni - Kolasib DC

Mizoram sorkar chuan November 23, 2021 aṭang khan Vairengte leh a chhehvel ramria hna thawk JCB-te chu an hna chawlhsantirin a hnûk kîr. Kolasib DC Dr H Lalthlangliana chuan, JCB-te'n an hna thawh tur an thawh zawh tawh avanga hna thawk chhunzawm lo an nih thu a sawi.

Vairengte aṭanga Vanglaini thu dawn danin, sorkar thuneitute chuan November 24, 2021 khan ramria JCB-te hnathawh tihtawp a ni tiin, hna thawka awmte chu a hnûk kir a ni. JCB-te hian November 23 thleng khan hna an la thawk hlawm a, November 24 aṭangin hnathawh an chawlhsan deuh vek a, an hnathawhna hmun an chhuahsan a ni.

JCB-te hnathawh chawlh-santir an nih chhan ziaka hmuh tur a awm lo a, a chhan sawi a awm lo. JCB tam zawk chu ramri aṭangin hnuh kìr a ni tawh. Hna zo tawh anga sawi ni mah se, zawh loh eng emaw zat a la awm a ni.

Vanglaini palai zawhna chhangin Kolasib DC Dr H Lalthlangliana chuan, JCB hnuh kîr chhan chu hna an thawh zawh tawh vang a nih thu a sawi a, "Hna la thawh zawh lohna hmuna mite chu kan hnûk kîr chuang lo a, hna an la thawk chhunzawm ang. November 2021 chhung hian hnuh kìr vek kan duh zawk a, mahse, hna an la zawh loh avangin kan theih hmel loh," a ti.

Tarlan tawh ṭhin angin, kumina Mizoram leh Assam-in ramria buaina a neih hnuah state pahnihin ramriah hma an la nasa a, Mizoram sorkar chuan police duty-te awmna pawh tur leh link road tur eng emaw zat JCB hmangin a lài a ni.

Mizoram sorkara Home department chuan November 8, 2021-a Mizoram leh Assam ramri depa awm district pahnih - Kolasib leh Mamit DC-te hnena ramria hmalakna titawp tura a hriattir hnuah, November 17, 2021 khan DC pahnih hi ramria hmasawnna hnathawh chhunzawm turin a hriattir leh a ni.

Home department chuan November 8 khan Kolasib leh Mamit DC-te hnenah hian Mizoram leh Assam ramri buai laiah chuan hmalakna neih loh tur (status quo) a nih thu a hriattir a; hei hi November 5, 2021-a Ministry of Home Affairs aṭanga thu an dawn anga tih a nih thu an tarlang.