Kan policy-ah hnam ṭobul chhuitu tur Commission din a tel - Lalduhoma

Chin Unity Forum (CUF) chuan July 28, Inrinni khan Tahan, Kaleymyo, Myanmar-a MYA Chapel, Methodist Church-ah ‘Inpumkhatna seminar’ an buatsaih a, Zoram Peoples' Movement (ZPM) chief ministerial candidate Lalduhoma'n hmanpuiin, Mizo hnam ṭobul chhui chhuaktu tur mi thiam rual awmna commission din chu an policy-ah a tel thu a sawi.

Lalduhoma chuan, Mizo hnam ṭobul chhui­chhuah a ngaih thu sawiin, “Hnam ṭobul chhui chhuaktu tur, mi thiam rual, sorkar sensoa thawk tur commission din hi kan policy a ni. Tunah hian kan chî leh kuangte ni si, Káwl, Naga leh a dangte'n an chîm ral an awm nual tawh. Kan zavaia kan pawm tlan theih tur kan hnam ṭobul chhuichhuaktu tur commission din vat a hun ta hle a ni," a ti.

Ṭawng chungchangah Lalduh­oma chuan, "Kan ṭawng hrang hrangte hi inzahsakin humhim ila, min khaikhawmtu tur hnam ṭawng chu a lo piang mai ang a, a mawi deuh leh lam awlsam apiang hi a dam khawchhuak mai dawn a ni," a ti a; chutiang thlentir tur erawh chuan rilru zau tak put a ngaih thu a sawi.

Hnam hming (nomenclature) chungchangah Duhoma chuan, “Ram hruaitu te, NGO hruaitute leh kohhran hruaitute’n hnam inpumkhatna rilru an put lai chuan mahni chi bing hming paihin Mizo an inti deuh vek mai a, hruaitute’n inpumkhatna rilru an put loh hunah Mizo inti duh loin mahni chi bing hmingah khan an kîr leh ṭhin," a ti. Khawvelah hnam tih tham tak leh ropui taka ding chhuak turin hnam hming leh ṭawng pakhat neih a ṭuk thu sawiin, "Common language kan neih vat a ṭul a ni," a ti.

Lalduhoma sawi danin, Mizote chu Pathianin hnamah a siam a, ramrite pawh a khamsak a; Pathianin Mizote tana ram a pek chu - Assam lamah Hringchar (Silchar) bul Duarban thleng, Bangladesh lamah Chittagong Hill Tracts thleng, Manipur lamah tuna Territorial Council-in a huam chin tur thleng, Myanmar lamah Chindwin lui thleng leh chhim lamah Teknaf Bay thleng, Tripura lamah Longtoroi leh Sakhan tlangdung thleng a ni. Chutiang a nih chuan, Mizo zat pawh nuai 30-40 vel ni tura ngaih a ni.

ZPM CM Candidate chuan, ramria insumdawn tawnna chung­changah sawiin, "ZPM-in kumina inthlan awm turah Pathian zara kan sorkar chuan, Act East Policy hnuaiah border trade changtlung tak neih kan tum dawn a, Zokhawthara Land Custom Station tihpuitlin thuai kan tum dawn. ZPM policy pui ber pakhat chu sawhthing kg. khat Rs. 50-a lei a ni a, Myanmar leh India sorkar hriatpuinain, khawchhak lama kan unaute’n sawhthing in tharte chu border trade item zingah telh ve ngei kan tum dawn a ni," a ti.