Two wheeler taxi-ah puanzar dum zár ; Aizawlah two wheeler taxi 2,377 a awm ; District tinah two wheeler taxi tlàntir tum

Aizawl Two Wheeler Taxi Association (ATTA) bultumin nimin khan Aizawla two wheeler taxi-te chuan two wheeler taxi permit pek chhuah belh tumna duh loh lantir nan an lirtheiah puanzar dum an zâr. Aizawl khawpuiah nimin thleng khan two wheeler taxi 2,377 a awm mek a, district khawpui 10 leh Thenzawl khuaah two wheeler taxi 385 tlàntir tuma hmalak mek a ni bawk.

Puanzar dum an zàr chungchangah ATTA chuan, Congress sorkar laiin two wheeler taxi 496 a awm thu an tarlang a, "Tun (MNF) ministry hian kum thum chhungin two wheeler taxi permit 1,889 a pe tawh a, tunah hian taxi la siam loh permit nei si eng emaw zat a awm mek. Hetih laia permit pek chhuah leh an la tum zel hi kan duh lo hle a ni," an ti.

Aizawl Traffic Police hotute hnen aṭanga Vanglaini thu dawn danin, nimin thleng khan Aizawl khawpuiah two wheeler taxi service lai 2,377 a awm mek. Taxi-te chu hlâwm pangaah ṭhen niin, sticker A,B,C,D leh E pek an ni a, an intlân chhâwk ṭhin a ni.

State Transport Authority (STA) secretary R Lalrammawia, Transport director ni bawk chuan Vanglaini palai zawhna chhángin, district khawpui hrang hrangah two wheeler taxi tlantir turin hma an lak thu a sawi a, "Aizawl khawpuia an service dan leh ṭhalaite tan eizawnna tlak a ni tih kan hmuh avangin STA chuan district hrang hranga DC-te hnenah lirtheia eizawng páwl hrang hrang leh NGO-te nen inráwn khawmin, an district khawpuia two wheeler taxi service an duh leh duh loh sawiho turin kan ti a, district khawpui zawng zawng leh Thenzawl khuaah service tir tura rawtna a lo lut," a ti.

STA Secretary chuan, district khawpui 10 leh Thenzawl khuaa two wheeler taxi tlantir tura rawtna an dawnte chu STA-in an zir chian hnuah a thawh khatna atan two wheeler taxi permit 385 pek ṭha an tih thu sawiin, "STA thutlukna hi sorkar hotute pawmpui a la ngai a, chumi hnuah permit dilna hun kan hawng leh ang," a ti a, tunah chuan permit dil theih a la ni lo tih a sawi.

STA-in a thawh khatna atana district khawpui 10 leh Thenzawla two wheeler taxi permit pek a remtih dan chu - Lungleiah 50, Siahaah 50, Champhaiah 45, Kolasib-ah 30, Serchhipah 38, Lawngtlaiah 50, Mamitah 20, Saitualah 30, Khawzawlah 25, Hnahthialah 35 leh Thenzawlah 12 a ni.