Sorkar sikulah zirlai an pung - Education Minister

School Education minister Lalchhandama Ralte chuan nimin khan Hnahlan Higher Secondary School a tlawh a, Mizoram sorkarin zirna a thuam chak avangin sorkar sikulah zirlai an pung niin a sawi.

Minister Lalchhan-dama Ralte chuan, sorkar sikulah zirlai an luh tam theihna turin theihtawp chhuah a nih thu a sawi a, "Zirna-in thuam ṭhat hna kawng hrang hrangin thawh a ni a, hripui léng karah zirtirtu chi hrang hrang 2,000 vel lak a ni tawh. Sikul chhia leh furniture-te pawh siamṭhat a ni. Heng hian naupang a híp a, naupang an pung a ni," a ti.

Education Minister chuan, "Tunah hian khaw hrang hrang aṭangin class room indaih loh thu leh furniture siam belh ngai report a lut deuh reng a ni," a ti a; class room indaih lo leh furniture siam belh ngai chu zirna kawnga hmasawnnain a hrin chhuah a nih thu a sawi.

Sorkar sikul khâr ngaia tluchhia awm loh nan ṭan lak a nih thu sawiin Lalchhandama chuan, "Tunah chuan khâr ngai a awm tawh lo a, khaw hrang hrangin an sawi chu khâr lam ni tawh loin naupang kan leng tawh lo, furniture kan indaih tawh lo tihte a ni ta zawk. Zirna hi kan ramah hian hmun pawimawh kan chantir a, chu chuan sorkar sikul a tiṭhang a ni," a ti.

Minister hi bialtu MLA Dr ZR Thiamsanga, MLA C Lalmuanpuia, School Education director James Lalrinchhana, Samagra Shiksha project director Lalhmachhuana leh official dangte'n an ṭawiawm a ni.