Covid-19 dinhmun thlirho

Health & Family Welfare minister Dr R Lalthangliana hoin nimin khan Secretariat conference hall-ah sorkar hotute'n Mizoram Covid-19 dinhmun an thlirho. Covid-19 vanga thi zingah symptom neih hnua swab sample endik mai lo leh Covid-19 vaccine la lo an tam niin tarlan a ni.

Ṭhutkhawmah hian Mizorama Covid-19 vei thar an tlem tial tial nia a lan thu an sawi a, "Sample test hi symptomatic base-a kalpui a nih tawh avangin positivity rate a sang lo thei lo a, inthlahdah a la hun lo. India hmarchhak state dangte aiin Covid-19 vanga thi tun dinhmunah kan pung chak zawk a, mitthi kan neihte dinhmun zirchianin, symptom neih hnu pawha test mai lo leh vaccine la lo an tam hle a ni," an ti.

Ṭhutkhawmah hian Aizawl mayor Lalrinenga Sailo, chief secretary Dr Renu Sharma, additional chief secretary JC Ramthanga, DMR secretary Vanlalngaihsaka, Health secretary R Lalramnghaka, Aizawl DC Dr Lalhriatzuali Ralte, Health, Home leh IPR department leh Zoram Medical College hotu te, Indian Medical Association, Medical Operation Team, Mizoram Kohhran Hruaitute Committee leh Aizawl City Local Council Association aiawhte an tel a ni.