Congress party-in CBI chhuitir an duh

Mizoram Pradesh Congress Committee (MPCC) chuan thuchhuah siamin, Swadesh Darshan Scheme-II hnuaia skywalk leh ropeway siam chungchanga thil fel lo awm nia lang chu Central Bureau of Investigation (CBI) chhuitir ngei ni se an duh thu an tarlang.

MPCC chuan, MNF Vigil-ance department leh Legal Board-te'n Sakawrhmuituai tlanga skywalk leh Durtlang-Chaltlang inkara ropeway siam chungchanga thil dik lo leh fel tâwk lo a awm ngeia a lan avanga Mizoram Lokayukta-a complaint an thehlut chu lawmawm an tih thu an tarlang a; chutih rualin, October 23, 2021-a Tourism minister Robert Romawia Royte-in Lungdaia a lo sawi tawh angin CBI chhuitir ngei ni se an duh thu an tarlang a ni.

Skywalk leh ropeway siamnaa thil dik lo awm nia sawite chu a chìnchhuaka chhui ni se an duh thu sawiin MPCC chuan, "Dan bawhchhiatna a awm a nih chuan dan bawhchhetute lakah dan ang taka action lak ngei ni rawh se tih hi kan duh dan a ni. Dan bawhchhetu an awm a nih chuan politician an ni emaw, official an ni emaw, dan anga hmalak a ni mai turah kan ngai," an ti.

Congress party chuan, thil kal tawhte thlirin, MNF sorkar thuneihna hnuaia chhui a nih chuan dikna a lal loh a hlauhawm an tih thu sawiin, "Lokayukta hian an hnena complaint lut hi CBI chhuitir ngei se la, MNF sorkar pawhin CBI chhui phalna hi pe ngei se, harsatna siam suh se tih hi Congress party duh dan a ni," an ti a; a taka thil dik lo hâi chhuak tur leh siamṭha tura hma la ngam tak tak si lo a, politics-a hamṭhatna hmuh tum ringawta che vêl reng an awm ṭhin chu ṭha lo an tih thu an sawi bawk.