CM Zorama'n DoNER Minister a kâwm

Chief minister Zoramthanga chuan November 24, Nilaini tlai khan New Delhi-ah Development of North East Region (DoNER) minister G Kishan Reddy chu a pisaah a kâwm a, bamboo link road leh Mizoram economy chungchang a sawipui.

Sorkar thuchhuah tarlan danin, CM Zoramthanga chuan DoNER Minister hnenah hian Gross Budgetary Support aṭanga hmarchhak state-te tana 10% pek tur chu tun financial year chhunga an hmuh tur zat hmuh a nih loh thu te, bamboo development atana link road siam a pawimawh thu leh chumi atan chuan state-in sorkar laipui aṭanga puihna a mamawh thute a thlen a ni.

Zoramthanga chuan, "Mizoramah mau leh rua tam mahse link road awm loh avangin a phurhna transportation cost a san phah a, mau chíngtute leh maua innghat industry neitute tan a hlâwk loh phah a, link road siam theih a nih chuan he harsatna hi sutkian a ni ang," a ti a; hmarchhak state-te'n hmasawnna tak tak an hmuh theih nan DoNER kaltlanga sum pek dan, pek zat leh hna thawh dante eng emaw chen ennawn a ngai nia a hriat thu a sawi.

Aizawl khawpui tâwt tiziaawm turin by-pass road siam a ṭul thu te, ruahmanna siam a nih tawh dan leh chumi siamna tur sum an dil chu hmuh ngei a beisei thute Chief Minister chuan a sawi bawk.

CM Zoramthanga hian nimin khan Israel ambassador Naor Gilon leh first secretary (political) Hodaya Avzada te chu Mizoram House, Chanakyapuri, New Delhi-ah a kâwm bawk a; Mizoram hmasawnna hmachhawp hrang hrangte leh thawhho theih dante an sawiho a ni.

Chief Minister hi State Planning Board vice chairman H Rammawi, adviser to CM (technical) K Lalsawmvela leh OSD to CM Rosangzuala ten an ṭawiawm a ni.