Covid-19 vei enkawl mek 2.98% chiah an awm tawh

November 24, Nilaini khan Mizoramah Covid-19 vei mi 398 hmuh chhuah a ni. Nimin khan hripui vei dam tawh mi 474 chhuahtir an ni a, mi pahnih an thi. Covid-19 vei enkawl mek 2.98% chiah an awm tawh.

Covid-19 vei hmuh thar mi 398-te chu mipa 181 leh hmeichhia 217 an ni a; ZMC laboratory-a hmuh chhuah 50, TrueNAT hmanga hmuh 66, RAT hmanga hmuh 279 leh Fluorescent Immunoassay (FIA) hmanga hmuh pathum an ni.

IDSP record angin, Mizoramah Covid-19 vei 1,33,118 hmuh chhuah a ni tawh a, mipa 64,393 leh hmeichhia 68,725 an ni a, mipa aiin hmeichhia 4,332-in an tam zawk. Nimin tlai dar 5 thleng khan mi 1,28,666 (96.66%) chhuahtir an ni tawh a, mi 486 (0.36%) thi tawhin, enkawl mek mi 3,966 (2.98%) an awm.

November 24, Nilainia Covid-19 vei hmuh thar mi 398 zingah symptom nei mi 224 an awm a, mi 142-in symptom an nei lo a, report-a dinhmun tarlan loh mi 32 an awm. Hripui vei hmuh chhuah thar zingah sikul leh hostel lama hmuh an awm nual a; sorkarin a tarlan zingah - St. Peter’s School, Chhingchhip hostel-ah mi 12, Bethesda HSS, Lungleiah mi pali leh Baptist HSS Boy’s Hostel, Lungleiah mi paruk an tel.

Nilainia swab sample endik aṭanga hripui vei hmuh zat (positivity rate) 10% chung lam district paruk a awm a, a sànna ber Champhai district-ah 38.09% a tling. Positivity rate 10% chung lam district dangte chu - Serchhip 25%, Mamit 24.24%, Hnahthial 18.18%, Lunglei 11.80% leh Aizawl 10.24%-te a ni.

Tun November thla chhungin Mizoramah Covid-19 vei mi 11,594 hmuh chhuah a ni tawh a, chawhrualin ni tin mi 483.08 hmuh chhuah an awm ang a ni a, a hniam hret hret. Mizorama swab sample endik tawh zawng zawngah RT-PCR hmanga endik zat percentage ni tin a tlahniam hret hret zel a, RAT hmanga endik zat a pung zel thung. November 23, 2021 thlenga swab sample endik tawh 14,12,502 aṭanga RT-PCR hmanga endik zat percentage chu 22.84 a ni a, RAT hmanga endik zat chu 71.25% a tling.

Kum 2011 chhiarpui aṭanga chhûtin, Mizorama Covid-19 vei hmuh tawh 1,33,118 chu mi 1,000 zelah hripui vei mi 121 an awm ang a ni a; mi 1,00,000 zela Covid-19 vangin mi 44 an thi tawh ang a ni tih sorkar thuchhuakin a tarlang.

Nimin khan tlai dar 5 thlengin hripui vei dam tawh mi 474 chhuahtir an ni a; Aizawl district-ah mi 268, Lunglei district-ah 57, Champhai district-ah 45, Lawngtlai district-ah 33, Siaha leh Mamit district-ah 21 ve ve, Khawzawl district-ah 19 leh Hnahthial district-ah 10 an chhuak a ni.