MNYF-in two wheeler taxi permit pek belh ṭha an ti

MNF ṭhalaite chuan thuchhuah siamin, Mizo ṭhalai khawsak harsa zawkte'n eizawnna ṭha an neih theihna tura two wheeler taxi pek chhuah a ni leh pek chhuah tuma hmalakna a awm mek chu lawmawm an tih thu an tarlang a, "Hemi atana hma latu Pu TJ Lalnuntluanga, Transport minister hi kan chhuang hle a ni," an ti.

MNYF chuan, Covid-19 lêng avangin mi tam takin eizawnna mumal an nei lo nia sawiin, "Sorkarin two wheeler taxi permit a pe chhuak hian mi tam tak tan eizawnna a siamsak a, chhungkaw tam tak phurrit a chhâwk zângkhai bawk. Permit pek chhuah hi chhungkaw tam takin eizawnna lama harsatna an tawh sutkianna a ni a, sorkar hna thawk ve thei lo ṭhalai tam takte tan eizawnna a siamsak a ni," an ti a, ṭhalai sang télin eizawnna atan an hmang mek niin an sawi.

ZPM ṭhalaiin two wheeler taxi permit pek chhuah tumna awm an duh loh thu an tlangaupui chu mak an tih thu sawiin MNYF chuan, sorkar hmalakna ṭha tak tak hmu thei loah an puh a, "ZPM party-in Covid léng avanga mipuite'n eizawnna lama harsatna an tawh chungchangah ngaihtuahna an sên tawk lohzia lantirna maiah kan ngai," an ti a; Transport Minister an thlâwp zel dawn thu an sawi bawk.