MDOA-in inkhawmpui an hmang

Mizoram Departmental Officers­'Association (MDOA) chuan nimin khan Taxation Auditorium-ah General Body Meeting vawi 12-na an hmang a, Information & Public Relations (IPR) minister Lalruatkima'n a hmanpui.

Minister Lalruatkima chuan, MDOA chu sorkar ruahmanna tihhlawhtlin kawngah leh ram leh hnam tana rohlu tling tur thilah an thiamna, finna leh theihna zawng zawnga sorkar finchhuah ṭhin turin a chah a, "In hnathawhnaa mimal hamṭhatna aiin mipui leh sorkar tana ṭha ber turte dah chungnung ber zel ang che u. Sorkar hnathawk nunphung leh che zia chu sorkar a inthlak pawhin a danglam thiang lo," a ti a; sorkar fawng chelhtu apiangte finchhuah leh thawhpui chu an mawhphurhna a nih thu sawi.

Social media-in nun a nghawng nasat thu sawiin Lalruatkima chuan, "Social media kan hman dan hi kan fimkhur a ṭul hle. Thu leh hla, thlalak leh video kan post dante hi dan kalh leh dan bawhchhiatna a ni em tih kan ngaihtuah chian a ngai hle a ni," a ti a; social media hman dan inzirtira inhrilh nawn fo turin a chah.

Inkhawmpui hi MDOA president Lalchuailova'n a kaihruai a, chawhnuah rorel inkhawm an nei. MJA hruaitute kaihhruainain hruaitu thar an thlang a, kum 2021-23 chhunga office bearer atan Lalchuailova, PB Lianthangpuii, Lalrammawia, C Vanlalchhuana, Dr JT Vanlalngheta, Lalsangpuii, Laltleipuii, C Lalnunmawia leh H Vanlalhlupuia te an thlang.

MDOA hi kum 1982-a din niin, department 29-a officer-te an tel a, member 500 chuang an awm a ni.