Pípúte sûlhnu zirho

Khawzawl RD Block leh Mizo Historical Village, Chawngtlai (MHVC) chuan nimin khan Chawngtlai rama Ṭântinchhingi Khawpuitan hmunah 'Khawzawl district-a pipute sûlhnu' tih thupui zirhona an buatsaih a, Khawzawl bawrhsap CC Lalchhuangkima'n a hmanpui.

He hunah hian MHVC member te, Chawngtlai VC leh khawtlang hruaitu te, Khawzawl College-a Mizo subject zirlaite an tel a; mi 11-in paper an buatsaih zirho a ni. Chawngtlai khua hi February 21, 2014 khan Mizo Historical Village-ah puan a ni a, Mizorama thingtlanga thlànmual nei hmasa ber leh Mizorama lungphun sang ber awmna a ni.