KHAWTHLIR

Zoram Medical College (ZMC) director kal chhuak ta, Dr L Fimate chu Medical Council of India (MCI) member atan ruat a ni. MCI hian chairperson, co-chairperson leh member 10 a ruat thar a ni.

Chhinga Veng East Branch KṬP chuan an branch din champha vawi 19-na pualin June 13, Inrinni khan Synod Hospital Blood Bank-ah thisen unit 22 an pe a, a petute mipa 20 leh hmeichhia pahnih an ni.

Deputy chief minister Tawnluia, Tuichang bial­tu MLA chuan a MLA fund aṭangin Covid-19 dona atan CM Relief Fund-ah cheng nuai 25 a thawh a, Khawzawl DC kaltlangin CM Relief Fund account-ah thun a ni. Tarlan tawh angin, MNF, ZPM leh BJP MLA-te chuan Covid-19 donaa hman atan MLA fund aṭangin cheng nuai 50 ṭheuh an thawh dawn a ni.

Chite Veng Local Council leh tlawmngai pawlte ruahmannain an venga in sak ṭhat ngai chu Inrinni khan sak ṭhatsak a ni a, bialtu MLA Robert Romawia Royte, minister of state-in ṭawiawmin, Rs. 10,000 leh hmai tuamna 100 a thawh. In sak nan hian contractor pakhatin Rs. 3,83,333 a thawh a, an housing loan bat Rs. 85,330 a rulhsak bawk. In hi Assam type, a dung ft. 24 leh a vâng ft. 18-a zauin sak a ni.

Health department chuan, June 13, Inrinni khan Zoram Medical College Covid-19 Laboratory-a swab sample endik tawh zinga hripui vei lo (negative)-te hming, veng, sample lak ní, endik ní leh thil dangte an tichhuak a; chu chu an website health.mizoram.gov.in ah an dah a, a duh tan download theih a nih thu an tarlang. Hetihlai hian nimina sorkar thuchhuah chuan Covid-19 negative-te result tarlanna hi Health department webiste-a dah chu ruahmanna thar siam a nih avangin lakthlak a nih thu a tarlang a ni.