R Lalzirliana'n Chawngpuii Khawthlir hawng

Art & Culture minister R Lalzirliana chuan nimin khan Serchhip Kawlri tlang chhîpah Serchhip Heritage Society-in Chawngpuii Khawthlir an sak a hawng. Minister chuan, pípu hmun hluite vawn ṭhata humhalh leh nan tlai luat a awm lo tih a sawi.

Kawlri tlanga Pastor Chhawna Ṭawngṭaina In tuala hawnna inkhawmah R Lalzirliana chuan, Serchhip Heritage Society-te hmalakna chu fakawm a tih thu a sawi a, "Hnam inpumkhatna leh inunaunate pawh kan ṭobul hriatnain nasa takin a ṭanpui thei a, Zo hnahthlak ṭawng chi hrang hrang inzúl tak tak si eng emaw zat awmte hian hnam ropui leh darh zau tak kan nihzia a tifiah a ni," a ti.

Chawngpuii Khawthlir hi Art & Culture Heritage Conservation grant-in-aid Rs. 8,22,000 hmanga sak a ni a; a hawnnaah hian adviser to CM C Lalramzauva, Art & Culture deputy director K Lalruala leh sorkar hotute an tel a ni.