Two wheeler taxi khalhtute harsatna sawipui

Congress ṭhalai president Dr Lalmalsawma Nghaka leh hruaitu dangte chuan nimin khan Aizawl Municipal Corporation (AMC) hotute an hmu a, two wheeler taxi khalhtute harsatna an sawipui. MPYCC chuan, tuna two wheeler taxi khalhtute chu thla khatah ni 14 chauh an tlan thei tih sawiin, permit pek chhuah belh tawh lo turin Mizoram sorkar an ngen.

MPYCC hruaitute hian AMC commissioner K Laldingliana an hmu a; AMC mayor Lalrinenga Sailo leh Deputy Mayor-te pawh hmuh tum mah se, pisaah an awm loh avangin an hmu lo a ni.

Dr Lalmalsawma Nghaka chuan, AMC chu Aizawl enkawltu ber a nih avangin Mizoram sorkarin tun hnaia two wheeler taxi permit pek chhuah belh a tumah, Aizawl khawpuiin a tlin tawh loh thu hrilhtu tur ber nia a hriat thu AMC Commissioner a hrilh a, "Aizawl khawpui dinhmun enin, tun dinhmunah sorkar hian two wheeler taxi permit pek belh rih tawh lo turin ka ngen a ni," a ti.

Permit petu Transport department-in AMC chu permit pek belh dáwnah an ráwn lo a nih chuan a kalphung a dik lo hle tih sawiin MPYCC President chuan, "Permit tam tak pek belhin Aizawl khawpui a nghawng tur leh harsatna a thlen tur lam an ngaihtuah lo niin a lang," a ti a; Aizawl khawpui traffic jam awm lohnaa siam tumtute'n ngaihtuahna an sêng tak tak lo nia a hriat thu a sawi.

Two wheeler taxi khalhtute dinhmun enfiah a ngai hle tih sawiin Dr Lalmalsawma chuan, "An stand enfiahpui a ngai a, mumal zawka stand siam belh a ngai. An harsatna tawh mekte hi rang taka enfiahpui an ngai a ni," a ti a; "Tunah hian taxi neitute hian thla khatah ni 14 vel chauh tlânna hun an nei thei a, hei hian an eizawnna dinhmun a chhiat chhoh mekzia a tarlang a ni," a ti bawk.

AMC commissioner K Laldingliana chuan, MPYCC thu thlente chu Mayor-te nen an sawiho tur thu leh ṭhutkhawm koin an lo ngaihtuah tur thu a sawi a ni.