2019-20 hnuah beng kaihhnawihah Mi 47,905-te dinhmun enfiah a ni

National Programme for Prevention and Control of Deafness chuan (NPPCD) chuan nimin khan Hospital & Medical Education auditorium-ah bengngawnna vên leh enkawlna chungchang sawihona, 'Stakeholder meeting cum review meeting' an buatsaih a; financial year 2019-20 aṭanga kumin September thla thlengin beng kaihhnawihah mi 47,905-te dinhmun enfiah an nih thu tarlan a ni.

Ṭhutkhawm hi NHM mission director Dr Eric Zomawia'n a kaihruai a, Person with Disability (PwD) chairperson Vanlaldiki Sailo khuallian a ni. NPPCD state consultant Dr Lalthanmawii Khalthang-in NPPCD kalphung leh hmalaknate a tarlang.

Vanlaldiki Sailo chuan, béng hriatna chak lote tana chênpui nuam ni turin mipuiin mawhphurhna sang tak an neih thu sawiin, "An ni tin nun atana thil awlsam leh remchang zawk dapsak dan kawng kan zawnpui thiam a ngai," a ti a; NPPCD-a thawkte chu ṭhahnemngai leh zuala thawk tur leh beng hriatna ṭha lo zawn chhuah kawngah theihtawp chhuah zel turin a fuih.

NPPCD hi Mizoramah kum 2014-ah kalpui ṭan a ni a, Aizawl East, Aizawl West, Lunglei, Siaha, Champhai, Kolasib, Serchhip, Lawngtlai leh Mamit district-ah te kalpui mek a ni.