Sinlung Hills Council dinna tur bill Assembly House-ah pass a ni

Nimin khan ni hnih awh tur Mizoram Legislative Assembly session ṭan a ni a; Home minister R Lalzirliana put luh, 'The Sinlung Hills Council Bill, 2018' chu lungrual taka pass a ni. Bill-ah hian Sinlung Hills Council (SHC) huam chin tur tarlan a ni lo.

Bill pu luttu Home Minister chuan, HPC(D) leh Mizoram sorkar inremna thuthlungin a tum ber chu, thuthlung siamtu pahnihte'n an pawm dun inremna ruhrel huam chhunga Sinlung Hills Development Council (SHDC) awm mek hnena thuneihna zau zawk pek a nih thu a sawi a, "He thuneihna hi council area chhunga mipui, vantlang, sum pai lama hmasawnna leh hnam ziaráng humhalhna lam hawi a ni ang," a ti.

R Lalzirliana chuan, inremna chuan council chhung mipuite tan vantlang khawsak chawikanna leh sum leh pai lama hmasawnna a nih tur ang a thlentir rualin, council chhungah boruak ralmuang leh muanawm a thlentir tur thu sawiin, "Hemi atan hian SHDC hi Sinlung Hills Council (SHC) tiaa thlak tum a ni," a ti a; SHC din chu tihmâkmawh niin a sawi.

SHC chu inremna thuthlunga tarlan angin, Mizoram Legislative Assembly-in dan a siam hmanga din tur a nih thu sawiin Home Minister chuan, "He bill hmanga dan bung leh cháng zam tur hrang hrangte hi Mizoram sorkar leh HPC(D) ten inbiakna an kalpui laia inremna atana a ruhrel leh a ruangám an lo pawm dun tawhte a ni," a ti.

SHC hi interim-a din phawt a ni dawn a, interim-a SHC General Council member turte pawh sorkarin an ruat tawh nia thu dawn a ni.

Interim sorkar term a tawp hunah SHC General Council member tur thlanna buatsaih a ni ang. Hetih lai hian, Bill-ah hian SHC huam chin tur tarlan a ni lo a; a huam chin tur ziah lan a nih loh chungchang hi House-ah member ṭhenkhatin an sawi lang a ni.

Nimin Assembly Session-ah hian April 11, 2018-a thi MLA hlui PB Nikhuma (89) sûnna hun hman a ni a, chief minister Lal Thanhawla bakah, eptu aiawh Lalruatkima leh R Romawia ten uina thu an sawi.

Chief Minister sawi danin, PB Nikhuma hi March 1929-ah Hnahlan khuaah a piang a, kum 1963-ah politics-ah lutin, April 1972-ah Mizo Union ticket-in Buarpui constituency-ah MLA atana thlan tlin a ni a, deputy minister niin, Medical & Family Planning department leh LAD a chang. PB Nikhuma hi YMA life member hmasa ber a ni bawk.

SHC Bill, 2018 tlangpuite
q Mizoram sorkarin SHC area tana village council area hrang hranga bithliah tur huam chhungah SHC a din ang.
q SHC chuan General Council leh Executive Council a nei ang.
q General Council-ah member 14 awmin, chung zinga member 12 chu mipuite thlan tur a ni a, member pahnih chu Council ráwn chungin sorkarin a ruat ang. Member 12 thlan chhuahte aṭangin chairman, deputy chairman leh chief executive member (CEM) thlan a ni ang.
q CEM-in member dangte aṭangin executive member pali a ruat ang.
q General Council term chu kum 5 atana ruahman a ni.
q CEM, executive member leh council member-te hlawh leh hamṭhatna dawn tur chu dan tesêp (Rules) hmangin sorkarin a la siam dawn.
q Sorkarin Sakawrdai emaw, Council area chhunga hmun dang emaw Council headquarters atan a la puang dawn.
q General Council-te chu thla li chhungin vawi khat tal an ṭhukhawm ṭhin tur a ni.
q SHC headquarters-ah Secretariat a awm ang a, secretary leh officer dangte'n an vil ang.
q General Council hian SHC huam chhunga hmasawnna hnathawhna lamah thuneihna zau tak an nei ang a, ram inpekna kalpui chungchangah Site Allotment Advisory Board (SAAB) angin hna an thawk ang.
q General Council hian village council-te'n chhiah/fee khawn theihna an neihnaah sorkarin a bithliah angin fee/chhiah a la ve thei dawn.
q General Council atana election kalpui dan tur Rules sorkarin a duang dawn.
q Council tan sum báwm hran ruahman a ni a, chutah chuan state sorkar leh hmun dang aṭanga sum dawnte dah luh tur niin, Council inrelbawlna kaihhnawih leh a huam chhunga hmasawnna ruhrel dinna atante sum pek chhuah ṭhin tur a ni.
q General Council hian anmahni inrelbawlna leh hmalakna turin kum tin budget a siam ang a, sorkar pawmpui turin an thawn ṭhin ang.
q Sakhuana thil leh khawtlang nunphung bakah, hnam dan leh hrai khawih thei thil dang siam a nih dawnin state sorkarin General Council a rawn ṭhin ang.
q General Council din a nih hma chuan sorkarin a theih anga hmain interim executive council din turin executive member lailâwk turte a ruat dawn.
q Mizoram electoral roll-a hming chuang kum 18 tling chinte'n SHC inthlan an chuh thei ang.