NIB-in MLA candidate tling lo mi pali NLUP dawng tur thlang turin a hriattir

NLUP Implementing Board (NIB) chuan kum 2013-a Mizoram Legislative Assembly inthlana Indian National Congress (INC) ticket-a ding, tling zo ta lo mi palite chu an dinna biala NLUP dawng tur thlang turin an hriattir.

Vangalini thudawn danin NIB hian ruling MLA 34-te an bial chhunga NLUP dawng tur thlang tura an hriattir rualin, kum 2013-a MLA inthlana INC candiadate tling zo ta lo dang pali - H Liansailova (Aizawl North-II), Dr Lalmalsawma (Aizawl West-II), S Hiato (Siaha) leh Tlangthanmawii (Aizawl West-I) te chu an dinna bial chhunga NLUP dawng tur thlang turin a hriattir a ni.

NLUP dawng tur hi H Liansailova'n mi 416, Dr Lalmalsawma'n mi 404, S Hiato-a'n mi 400 leh Tlangthanmawii'n mi 400 an thlang a ni. Congress party-in kum 2013 inthlana an chak lohna bial dang pahnih - Aizawl West-III leh Tuikum bialah chuan, heng bial pahnihte Congress party aṭanga viltu atana ruatte chu NLUP dawng tur thlang tura hriattir an ni .

Congress MLA 34-te leh Congress candidate tling ta lote'n NIB-in a hriattir anga NLUP dawng tura an thlan zawng zawng chu mi 16,400 an ni a; a thlang tam ber Lal Thanhawla'n Rs. 550 a thlang.

NIB-in NLUP dawng tura hriattir a thawn chhuahah chuan, 'Tun kum kal mek atan NLUP-NEDP convergence-ah 'Bial hming' chhung atan cheng nuai 4 dah a ni a, benificiary pakhat zel tan cheng nuai khat ṭheuh ruahman a ni. 'Bial hming' chhung aṭangin benificiary 400 i thlante NIB-ah February 14, 2018 aia tlai loah rawn thehlut turin ka ngen a che' tih a ni. Lehkha hi NIB chairman JH Ro-ṭhuama hminga siam a ni.