Session hun hriattir har vangin MLA-te'n zawhna an thehlut lo

Nimina ṭan Legislative Assembly session-ah MLA-te'n session neih hun tur an hriat tlai avangin zawhna an thehlut hman lo. Hei vang hian ni hnih awh tur session-ah hian zawhna leh chhanna hun siam a ni dawn lo.

MNF member Lalruat­kima chuan, tun ṭuma session neih tur hi June 11, 2018-ah kohna tihchhuah a nih thu a sawi a, "June 12 zanah session kohna kan hmu ve chauh a, danah chuan session koh a nih dawnin ni 15 aia tlem loa hmain member-te hriattir tur a ni. June 12 zanah kan hmuh chauh avangin ni 15 a tling hman lo a, hetiang hi tun hnuah thleng tawh lo se ka duh a ni," a ti.

Hemi chungchangah hian Assembly speaker Hiphei chuan, MLA-te'n kohna chu June 12 zan­ah hmu mah se, ni 12 chu chhiar tel theih tho a nih avangin dan bawhchhiatna a awm lo niin a sawi thung.

Lalruatkima chuan, session-ah zawhna siam a nih dawnin, session hun ni 15-a a la thlen loh thleng thehluh theih a nih thu sawiin, "June 12-ah session neih tur kan hmuh chauh avangin zawhna thehluh hman a ni lo. Hei hi intihmualpho tum vanga sawi ka ni lo," a ti a; kohna hmuh tlai chuan House zahawmna a tihchhiat palh a hlauhthawn thu a sawi.

Lalruatkima chuan, emergency thil chu ni se, ni 15 hmaa member-te hriattir loa koh pawh ni se àwm a tih thu sawiin, "Summon-ah emergency a nih thu engmah a inziak lo," a ti.

Chief minister Lal Than­­hawla chuan se­s­sion-a ngaihtuah tur The Sinlung Hills Council Bill, 2018 leh Citizenship (Amendment) Bill, 2016 chu thil hmanhmawh thlak a nih thu a sawi a, "Emergency tih inziak lo mah se, emergency a ni," a ti a, Dr K Beichhua zawhna, 'Question siam in hlau a ni lo maw?' tih chu, zawhna siam an hlauh loh thuin a chháng.