Lumpsum aided school 9-te la khâr zel Zirlaite'n zirna chhunzawm duhna an lantir

Mizoram Government Lump­­sum Grant-In-Aid Higher Secondary School Association (MIGLAHSSA)-in Mizoram sorkarin lumpsum grant-in-aid a pek mek higher secondary school pakuaa zirtirtute leh an awmna khawtlangin adhoc aided dinhmuna dah phûta sikul an khâr chu an la chhunzawm zel. Hetih lai hian, sikul pakuaa zirlaite chuan nimin khan an sikul ṭheuhah kalin, zirna chhunzawm thuai an duhzia an lantir.

Lumpsum grant-in-aid higher secondary school pakua - Tuisualral HSS, Phullen HSS, Farkawn HSS, NE Khawdungsei HSS, East Lungdar HSS, Thingsulthliah HSS, Zobawk HSS, West Phaileng HSS leh Zawlnuam HSS-a lut zirlaite chu nimin khan an sikul ṭheuhah uniform hàin an kal a; an sikul tualah zirna chhunzawm vat an duhzia lantirin sit-in demonstration an nei a; khaw ṭhen­khatah chuan khaw chhung kawtthlerahte demonstration an nei bawk.

Sikul pakuaa zirlaite hian an harsatna sutkiansak tura sorkar an ngenna thuziak hrang hrang an keng a, chu'ngte chu khawlaiahte an tár nghal. Zirlaite hian an nu leh pa, khawtlang phurrit chhâwk tura sorkar an ngenna thu te, evaluation scheme thar hnuaia ni khat lek sikul ṭhulh pawh a pawiziate an tarlang a ni.

MIGLAHSSA chuan nimin khan thuchhuah an siam a; HSS pakuaa zirlai 850velin zirna an chhunzawm thei lo chu pawi an tih thu leh an rilru a nat thu tarlangin, "Khawtlang phurrit leh zirlaite harsatna sukiang tur hian kan sorkar hi kan la beisei fan a ni," an ti.

MIGLAHSSA chuan, "Tuna kan zirlaite'n an tawrhna hi rapthlak kan ti a, tumahin tuar ve lo se, mi dang nunah pawh nghawng ṭha lo thlen lo se kan duh," an ti a; adhoc aided dinhmuna dah an nih theih nana hma an laknaa an thawhpui school managing board, V/C, action committee, zirlai pawl leh NGO zawng zawngte chu tharum thawhna tel loa muanawm taka an duhnate lantir zel turin an ngen.

Tarlan tawh angin, MIG­LAHSSA-in lumpsum aided HSS pakuate adhoc grant-in-aid dinhmuna dah tura hma an laknaah hian school managing board, an awmna khaw V/C-te leh NGO dangte nen inthurualin June 18, 2018 aṭang khan sikul an khâr ṭan a, ni riat chhung sikul an khâr tawh a ni.