Health Minister leh AVDB-te'n Thisen petute chungah lawmthu an sawi

Health minister Dr R Lalthangliana chuan kumin June 14-a World Blood Donor Day pualin thuchah a sawi a, "Damlo thisen mamawh ngawih ngawihte tana tlawmngaia thisen petute kan hre reng che u a, in tlawmngaihna leh mi dang tana in inpekna kan thinlungah a nung reng a ni," a ti. Association for Voluntary Blood Donation (AVBD) Gen. Hqrs. pawhin nimin khan thuchhuah siamin, World Blood Donor Day (June 14)-ah Mizoram mipui, a bik takin damlote nunna chhan tura thisen petu zawng zawngte zahna chibai an bûk. Hun remchang hmasaah pawl hminga thisen pe ṭhate chawimawina hlanna inkhawm buatsaih an tum thu an tarlang.

Dr R Lalthangliana chuan, "Thisen pek hi hmangaihna, lainatna leh mi dang ṭanpui duhna rilru putute tan lo chuan tih theih a ni lo a, chuvangin, thisen petute hi Kristianna leh tlawmngaihna hnam neitu Mi­zote tan ngaihsan loh theih loh an ni," a ti a; mihring nunna atana hlu ber thisen sáwr chhuak a, mangang leh ṭanpui ngaite tana hlàntute bâka zah leh ngaihsan tur an awm chuan loh thu a sawi.

Health Minister hian thisen pek kawnga hma latu sorkar hnathawkte leh pawl te, thisen petu pawl hrang hrangte leh mimalte chungah lawmthu a sawi a, "Thisen petute zawng zawng chungah lawmthu ka sawi a, thâ thlah loin i chhunzawm zel ang u," tiin, thisen pe chhunzawm zel tur leh Pathianin hriselna a pek chu mi nunna chhanna atan hmang zel turin mi tin a sáwm. A thlawna thisen pek chu damlo tan a him ber avangin voluntary donation uar zel turin a sáwm bawk.

AVBD chuan, kum 2019-20 financial year chhunga a thlàwna thisen pek (voluntary blood donation) zat tura target an siam chu 90% a ni tih sawiin, "Mizo ṭhalaite inpekna leh tlawmngaihna avangin kan target hi tlinin, 90.90% lai voluntary donation a ni chho a, kan lawm hle," an ti a; tun hnai Covid-19 hripui léng vanga Mizorama inkhàrkhip vanglai, April leh May thla bikah pawh pawl hrang hrangte zarah voluntary donation chu 95% a tling tih an sawi.

AVBD tarlan danin, financial year liam ta April 2019 - March 2020 chhunga Mizorama thi­sen pek zawng zawng chu unit 30,448 a ni a, kum khat chhunga thisen pek zat sing thum a tlin vawi khatna a ni. Unit 30,448 zinga unit 27,676 chu voluntary donation a ni a, chu chu 90.90% a tling. Unit 2,772 erawh chu replacement a ni thung. Blood bank-a kala mahnia thisen pe - individual donor-te'n an pek zat chu unit 7,433 a ni.

World Blood Donor Day chu kum dangah chuan programme lian tham taka hman a ni ṭhin a, pawl hminga thisen pe ṭhate hnenah chawimawina leh lawmpuina hlan a ni ṭhin tih sawiin AVBD chuan, "Kuminah erawh chuan lian tham taka hman a remchang lo a, hun remchang hmasaah pawl hminga thisen pe ṭhate hnenah chawimawina hlan a tum a ni," an ti.

AVBD chuan, "Mi dangte tana malsawmna nih tuma nunna chhan tura thisen petute zawng zawng chungah lawmthu kan sawi a, an inpeknate kan chhuang em em a ni," an ti a; Mizoram State Blood Transfusion Council (SBTC), MSACS leh blood bank hrang hranga thawk te, kohhran ṭhalai pawl zawng zawng, NSS, YMA leh thisen petu pawl hrang hrangte chungah lawmthu an sawi tih an tarlang bawk.