Motor silencer ring chi-ah Dan lekkawh dawn

Traffic SP H Ram­thlengliana chuan thu­chhuah siamin, The Central Motor Vehicles Rules, 1989 Section-120 angin, lirthei silencer rin zawng bituk aia ring lirthei silencer hman khap tlat a nih avangin, he dan hi khauh zawka kenkawh a nih dawn thu thu a tarlang.

Traffic SP thuchhuah chuan, Aizawl khawpuiah lirthei, LMV leh two wheeler-ah danin a bituk aia ring silencer siam chawp (modified silencer) hmang eng emaw zat an awm tih hriat a nih thu a tarlang a, "Danin a phal bak aia ring lirthei silencer hmangtute man chhuah hna hi tun aṭang chuan traffic police-te'n sound level meter nen uluk zawkin an nei ṭhin tawh dawn. Silencer ring vanga man hnu, man nawn leh an awm chuan lirthei registration cancel thlenga hmalak a ni ang," a ti.

Traffic SP chuan, Aizawlah wrong side (vei lam)-a mi dang lehpelh chíng an awm tih sawiin, "Hei hi a hlauhawmin chhiatna nasa zawk thlen thei a nih avangin tih loh tawp tur a ni," a ti; double overtaking leh road divider pêla lirthei khalh phal a nih loh thu hriattirna chhuah tawh chu lirthei khalhtute'n hmangtute'n an zâwm ṭha ṭan viau tih sawiin, lirthei ke pali nei (LMV leh a chunglam) khalhtute chu two wheeler khalhtute kalna tur kian zâwngin, veilam nêk thei ang bera lirthei khalh turin a chah bawk.