Nau chunga thihna tihtlem kawnga Thawh ṭhat lawmman dawng dawn
Sorkar laipuia Ministry of Health and Family Welfare chuan kum 2017-18 inkara nu, nau chunga thi tihtlem kawnga hna thawk ṭha state zingah Mizoram a thlang niin sorkar thuchhuah chuan a tarlang.
Sorkar thuchhuah tarlan danin, nu nau chunga thihna tihhniam kawnga thawk ṭha lawmman hi June 29, 2018 tlai dar 5 khian New Delhi-a Hotel Hyatt Regency-ah Union Health minister Jagat Prasad Nadda-a'n a hlan dawn a; Mizoram aiawhin National Health Mission (NHM)-a mission director Dr Lalrozama leh leh Reproductive Child Health (RCH)-a state project officer Dr Hmingthanmawii ten an dawng ang.
Nu nau chunga thi tihtlem kawnga hma la ṭha leh lawmman dawng tur zingah Mizoram a tel thu hi June 21, 2018 khan MoHFW joint secretary Vandana Gurnani chuan e-mail hmangin Mizoram Health secretary Lalrinliana Fanai leh NHM mission director Dr Lalrozama te a rawn hriattir a ni.
Mizoram NHM chhinchhiah danin, kum 2016-17 chhunga Mizoram puma nu nau chunga thi zat chu 20 an ni a, kum 2017-18 chhungah erawh chuan 14-ah a tlahniam a ni.
April 21, 2018 khan Union Health minister Jagat Prakash Nadda chuan Mizoram State Quality Team hnenah hna thawk ṭha chawimawina a lo hlan tawh bawk. Trophy hlan chhan chu, National Quality Assurance Programe-a hmalaknaah AIzawl Civil Hospital chu NQAS certified a nih vang a ni.