Distributor-te term titawp turin ngen
MNF ṭhalai (MNYF)-te chuan nimin khan Mizoram State Lottery office-ah director Jennifer HL Duhawmi leh joint director Zoramchhana te an kâwm a; Mizoram state lottery kalpuitu firm pali term tàwp tawhte chu chawlhtir nghal turin an ngen.
MNYF vice president H Ramdinliana chuan, Congress kaihhruai Mizoram sorkarin Mizoram tana hlâwk lo thei ang berin kum 2012 aṭangin lottery a kalpui niin a sawi a, "Chief Minister duhsakna dawngtu firm palite chu an agreement tàwp hnuah vawi hnih lai tender thar ko loin an term pawhseisak a ni tawh a, an term pawhsei vawi hnihna hi May 29, 2018-ah a tàwp tawh chungin tun thleng hian an la hmang reng a ni," a ti.
MNYF Vice President-in CAG Report 2016-in a tarlan a sawi danin, kum 2012-15 chhungin lottery aṭanga sum hmuh chu cheng vbc. 11834.22 a nih laiin, Mizoram sorkarin lottery distributor-te aṭanga sum a hmuh chu cheng vbc. 25.45 chauh a ni.
H Ramdinliana chuan, "A hlâwk lo thei ang bera lottery kalpuitu firm palite term tàwp hnuah pawh vawiin thlenga lottery an la kalpuitir zel hi thil dik lo leh sorkar tana hlohna nasa tak a ni. MNF ṭhalaite chuan tuna an term tawp tawh firm palite an term tawp hnua lottery a la kalpuitir reng hi a rang thei ang bera titawp nghal turin sorkar kan phût a ni," a ti a; lottery-a eirukna lian tham tak chu CBI chhuitir thuai turin sorkar an phût bawk tih a sawi.
MNF ṭhalaite hi Mizoram State Lottery office kawtah hian Mizoram state lottery scandal CBI chhuitir an phût thu leh lottery distributor term tàwp tawhte tihtàwp nghal an phût thutein an au rual a ni.