Cheng nuai 384.33 hû ruihhlo hâl

Mizoram police-te chuan June 26, Thawh­lehni khan Aizawl Zoological Park-ah ‘Inter­national Day Against Drug Abuse and Illicit Trafficking' an hmang a, DGP Balaji Srivastava-a'n a hmanpui. He hunah hian ruihhlo an man sa cheng nuai 384.33 hû an hâl ral.

Mizoram police thu­chhuah chuan, Inter­national Day Against Drug Abuse and Illicit Trafficking an hmannaah hian police-te chuan ruihhlo laka Mizoram leh hnam a him theih nan ruihhlo do kawngah ngawrh zawka hmalak an tum thu an tarlang.

Police-te hian ruihhlo an man sa eng emaw zat chu Aizawl Zoological Park-a incinerator hmangin an hâl ral a; chu'ngte chu khehpuam (Pseudoephedrine) kg. 904.318 a ni a, Rs. 3,84,­33,515 hûa chhût a ni.

Ruihhlo hâlte hi kum 2012 - 2015 chhunga police station hrang hranga Special Narcotic PS panga - Champhai PS, Aizawl PS, Serchhip PS leh Bairabi PS ten an man, NDPS Act hnuaia thubuai chinfel tawhte a ni a; Court-in tiral tura thu a pek tawh leh Police headquarters-a High Level Drug Disposal Committee thutlukna anga dan ang thlapa tihral tura an tihte a ni.