RT-PCR test-ah kan hnufûm ber, Sorkar inthlahdah vang a ni - MPYCC

Congress party ṭhalaite chuan thuchhuah siamin, "Mizoram hi India ramah RT-PCR test-ah kan hnufûm ber a, sorkar inthlahdah vang a ni," an ti a; Covid-19 chungchangah a chak thei ang bera swab test kalpui a pawimawh hmasa ber niin an tarlang.

MPYCC chuan, Health mi­nister Dr R Lalthangliana'n Chennai aṭanga lo hawte RT-PCR endik vek tur a tih laiin, sorkar­in rapid antibody test (RAT) hmang bawka endik leh an ni chu Mizoram sorkar inrêlbàwlna mumal lohzia tilangtu a ni tih thu an sawi a, "A zahthlak hle. MEIHO University, Taiwan chuan, an zir chianna aṭanga an hmuh chhuah chungchangah Mizoram CM Zoramthanga hnenah RAT chu developed ramte'n an hmang tawh lo a, hun khawhralna mai a ni, tiin hmang tawh lo turin thurâwn an pe a ni," an ti.

RT-PCR tichaktu automated RNA extractor June 10, 2020-a chah thlen chauh a ni chu sorkarin mamawh hmasa a ngaihtuah miah loh vang nia sawiin MPYCC chuan, "Tuna kan mamawh ber chu positive hmuh chhuah vat vat a ni a, a tam thei ang ber swab sample test a ngai. Phai aṭanga lo hawte sample RT-PCR hmanga kan test vek thei lo hi sorkar mawhphurh liau liau, inbuatsaihna ṭhat lohzia tilangtu a ni," an ti a; swab test kawnga sorkar chu inbuatsaih chak loah an puh.

Congress ṭhalaite chuan, Covid-19 hripui a darh zel loh nan sorkar ruahmannate ṭha taka zâwm turin mipui an ngen a; hripui a darh zel loh nana thawktu sorkar hnathawk, mipui, NGO leh task force duty-te chungah lawmthu an sawi bakah, Covid-19 vei zawn chhuah kawnga thawktu ZMC-a thawkte fakawm an tih thu an sawi.

Congress sorkarin medical college bul a lo ṭan hman chu tun ang hun harsa atana Pathianin Mizoram hmasawnna a buatsaiha an ngaih thu sawiin, "Medical college din a nih theih nana hma latu Congress sorkar leh Health minister hlui Lal Thanzara fakawm kan ti hle," an ti.