KHAWTHLIR

Ministry of Environment, Forest and Climate Change-in tun hnaia office order an tihchhuah danin, Mizoram sorkara principal chief conservator of forest (PCCF), PWD secretary leh principal secretary to chief minister hna chelh mektu Lalram Thanga, IFS chu PCCF level-17-ah a kaisang a, Arunachal Pradesh-ah PCCF hna a chelh dawn. Mizorama additional principal chief conservator of forest (APCCF) Liandawla, IFS pawh PCCF level 16-ah a kaisang a, Lalram Thanga hna chelh ṭhin Mizoram PCCF hna a chelh ang.

Kar kal ta Zirtawpni zan zanlai pelh hnu, zing dar 1-2 vel khan Melriat khuaah Assam type in pakhat, chhungkaw pahnih luah lai chu a kâng a, bungraw chuh hman lohin a kâng ral. In hi Thanliana, Khatla, Aizawl in a ni a, Jerry-a te chhungkua leh Lalngaihawma te chhungkaw luah lai a ni.

July 28, Inrinni khan Salvation Army Youth, Thingsulthliah commanding officer bial chuan nimin khan Aizawl Civil Hospital tan thisen unit 60 an pe a, a petute mipa 55 leh hmeichhia panga an ni. Dinthar Vengthlang Branch KṬP-in Synod Hospital tan thisen unit 30 pein, a petute mipa 24 leh hmeichhia paruk an ni a; ṬKP, Champhai Karawt unit-te'n ṬKP Day pualin Champhai District Hospital tan unit 17 an pe a, a petute mipa 13 leh hmeichhia pali an ni.

July 27, 2018 zan dar 8 vel khan Priscilla Ramhlutpuii (9) d/o Daniel Vanlalhlimpuia, Salem Veng, Aizawl chu an in varanda aṭangin a tla a, damdawi-inah hruai niin, Inrinni zing khan a hliam tuar loin a thi. Ramhlutpuii hi Inrinni khan vui nghal a ni.

Vanglaini July 28, 2018 chhuaka Police-in document lem siam ṭhin an man zinga Joseph Laldampuia (25) s/o F Lalhmingliana, Tuikual South tih chu Joseph Laldampuia (25) s/o F Lalhmingliana, Tuivamit tih zawk tur a ni.