Sorkar kal meka session hnuhnung ber a ṭiak ; Ṭum 16 session-ah dan 48 pass a ni

Mizoram sorkar term kal mek, Mizoram Legislative Assembly pasarihnaa Assembly session hnuhnung ber chu nimin khan a ṭiak. 7th. Legislative Assembly of Mizoramah hian Assembly session ṭum 16 neih a ni a, dan 48 siam (pass) a ni.

Tun sorkar term chhunga session hnuhnung berah hian tih tur pawimawhte tih zawh a nih hnuah speaker Hiphei-a'n a sàwm angin, House leader Lal Thanhawla leh opposition group leader Vanlalzawma ten thu an sawi a; chumi hnuah Speaker chuan tlai dar 3:20-ah 7th. Legislative Assembly-a Assembly session hnuhnung ber a titawp a ni.

Chief minister Lal Thanhawla chuan, an term chhung member zingah dam lohna vanga phai lama inenkawl ngaite awm ṭhin mah se, an inṭawngṭaisakna avangin dam taka an rawn haw leh ṭhin thu a sawi a, "Kan term chhungin Pathian kaihhruaina kan dawng hle a, a lawmawm tak zet a ni," a ti.

House chhunga Speaker leh member-te chet dan fakin Lal Thanhawla chuan, "Speaker-in duhsak bik nei loin min hruai a ni. Hmun dangah chuan ṭul lo leh awmze nei lo, MLA tih atan mawi loa inauhte a awm

ṭhin a, chutiang awm loa hun kan hmang thei hi a lawmawm hle," a ti a; party hrang leh thil thlir dan inang loah inhnial cháng a awm loh theih loh thu a sawi.

Lal Thanhawla chuan, tun sorkar term-a House chhunga nun dan phung chu chhawm nun zel ni se a duh thu sawiin, "House-ah hian a ṭhen kan la awmin, a ṭhen kan awm tawh lo mai thei. House-a la awm zel turte'n kan kalphung hi chhunzawm zel se ka duh. Famkim lo a awm a nih chuan tifamkim pah zelin," a ti.

Theihtawpin ruling lam pawhin disci­pline an vawn thu sawiin Chief Minister chuan, "Mihring kan nih miau avangin tlin lohna kan nei lo thei lo. House-a mawi lo taka kan lo khawsa a nih chuan ngaihdam ka dil e. Ram tana ṭha turah chuan kan lungrualin, kan ngaihdan a inang tlang hle," a ti a; member-te chu Mizo nihna leh sakhuaah an chian thu a sawi.

House Leader chuan, eptu party-te fakin, "House zahawmna pawimawh tak chu eptute an ni. Constructive opposition party neih hi ruling tan chuan thil lawmawm tak a ni a, chutiang chu tuna opposition party-te hi an ni. Eptu MLA-te hnenah lawmthu ka sawi a ni," a ti.

Eptu leader Vanlalzawma chuan Speaker-in a kaihhruai danah lawmthu sawiin, "Tuna kan Speaker anga experience nei ṭha hi Mizoram hian Speaker a neih ka ring tawh lo," a ti a; Speaker leh a hote zawng zawng hnenah eptu aiawhin lawmthu a sawi.

Vanlalzawma chuan House Leader fakin, "Kan rorelnaah House Leader a fakawm hle. Session-ah a tel thei reng a, min uap reng ṭhin hi a ropui hle a ni," a ti.

Eptu zingah K Sangṭhuama tih loh chu MLA term khatna vek an nih thu sawiin Vanlalzawma chuan, "Experience nei lo kan ni a, ruling MLA-te'n min dawhthei a, a lawmawm hle. Member-te kan inkâwm ngeih a, state dangah hetiang hi a awm ve ang em aw ka ti ṭhin," a ti a; Mizoram MLA-te anga innêl hmun dangah an awm theia a rin loh thu a sawi.

Tun ṭum session ni hnih awhah hian House-ah report pasarih a lut a, paper pakua pharh niin, dan pahnih pass a nih bakah, official resolution pakhat pawm a ni.