NLUP dawng tur thlangtu tur ruat dan MNF-in Governor hnenah an thlen

MNF hruaitu, elected office bearer-te chuan nimin khan Governor Kummanam Rajasekharan chu a pisaah an hmu a; NLUP Implementing Board (NIB)-in kum 2013 Assembly inthlana Congress party candidate tling zo lote NLUP dawng tur thlang tura an tih chungchang chu dan kalh­ah ngaiin, a ṭul anga hma la tura ngenna an thlen.

Governor hmutute hi MNF president Zoram­thanga, senior vice pre­sident Tawnluia leh vice president R Tlanghming­thanga te an ni a; NIB-in thil tih dang chungchangah hma la tura Larsap ngenin, "A rang lama a ṭul anga hma min laksak turin kan ngen a che. NIB thil tih dan hi dan dik lo a nih bakah Govt. Financial Rules kalh tlat a ni," an ti.

MNF hruaitute tarlan danin, NIB-in an chairman JH Roṭhuama, MLA hmingin lehkha an thawn chhuak a, chutah chuan Congress MLA zawng leh Congress mi leh sa MLA ni lo mi palite chu NLUP dawng tur mi 400-500 thlang turin an hriattir a ni.

MLA pahnih chu an bial bakah, Congress MLA nih lohna bial pakhat ve veah NLUP dawng tur thlang tur hian hriattir an ni bawk.

MLA ni lo, sorkar hnathawk pawh ni lote an duh zawngte hnena sorkar sum cheng nuai 400 chuang pektir chu sorkar Financial Rules kalhna lian tak a ni.

Governor an kawm zawhah thuthar thehdarhtute hmaah thu sawiin MNF President chuan, "MLA pawh ni lote cheng nuai 400 ṭheuh an sem tur an thlantir hi a mak lutuk a, sawi dan pawh ka thiam lo. Ka sawi thiam dan ber chuan 'Khaw êng pawh an zah lo' tih a ni mai. Congress chu hmana Delhi-a Congress ang tho an la ni a, an corrupt hle a ni," a ti.

Zoramthanga chuan, MLA ni lo, sorkar hnathawk pawh ni lo NLUP dawng tur thlantir an ni chu an ngawihbopui dawn lo tih sawiin, "A ṭul angin, a ṭulna apiangah kan thlen zel ang," a ti a; Congress chet dan chuan chiang taka dan a kalh thu a sawi a ni.

MNF lehkhaa an ziah lante
l NLUP lehkha thawn chhhuahah NIB Chairman leh Secretary-in hming an ziak.
l Constituency tina MLA-te chu cheng nuai 400-550 ṭheuh pek an ni a, chu chu beneficiary pakhat tan cheng nuai khat zel tihna a ni.
l Ruling MLA zawng zawngte chu NIB chairman JH Roṭhuama'n NLUP cheng nuai khat dawngtu tur thlang turin a hriattir a, MLA pahnih chu constituency dang pahniha beneficiary thlang tura tih an ni.
l Congress party mi ni lo MLA an nihna constituency pali-ah MLA ni lote beneficiary thlang tura tih an ni a. Congress-in MLA an neih lohna constituency dang pahnihah Congress MLA pahnihte beneficiary thlang tura tih an ni.
l Sorkar sum cheng nuai 400 chuang sema a dawngtu turte thlang tura mi pangngai, MLA emaw, sorkar hnathawk emaw pawh ni lote tih an ni hi Financial Rules kalh a ni.
l Inthlan dawn hnaih tawha Congress MLA zawng zawngte cheng nuai 400 chuang ṭheuh semnaa a dawngtu turte thlang tura tih an nih laiin, Congress ni lo MLA dang parukte tih an ni ve loh hi Financial Rules kalh hulhual a nih bakah, khaw êng pawh zah zo loa thil zahthlak tawp tihna a ni.