Citizenship (Amendment) Bill duh lohna Assembly House-ah resolution pass a ni

Nimina Assembly session-ah Home minister R Lalzirliana official resolution, 'The Citizenship (Amendment) Bill, 2016' duh lohna chu lungrual taka pass a ni.

Home Minister official resolution chu, 'He House hian The Citizenship Act, 1955 siamṭhat tumna, Citizenship (Amendment) Bill, 2016-a dan loa India rama pêm lutte an sakhaw behchhana Indian citizenship pek an nih theihna tur siam hi nasa takin a dodal tih sorkar laipui a hriattir' tih a ni a; member eng emaw zatin an sawizau hnuah pass a ni.

R Lalzirliana chuan, Citizenship Act, 1955 chu December 30, 1995-ah hman ṭan a nih thu sawiin, "He dan chhunga Section 5 leh 6-ah citizenship dil theih dan, 'Citizenship by Registration' leh 'Citizenship by Naturalization' a chuang a, dan loa ram chhunga rawn lut (illegal migrants)-te tana citizenship neih theih dan erawh a chuang lo," a ti a; he danah hian illegal migrant sawifiahna pawh a awm thu a sawi.

Citizenship (Amendment) Bill, 2016 chu Citizenship Act, 1955-in minority community zinga tute pawh, India rama travel document mumal tel loa lo lut leh an document-in a phalsak baka chámbángte chu illegal migrant-a ngaih tur a nih thu leh, citizenship pawh dil thei lo tura a tarlan tihdanglam tumna a nih thu sawiin R Lalzirliana chuan, "A awlsam zawnga sawi chuan, Bangladesh rama Buddhist sakhaw vuantua chu India ramah dan lo pawhin rawn lut se, kum 7 hnuah Indian citizenship a dil thei dawn tihna a ni," a ti.

Home Minister chuan, dan siamṭhat tumna chu a lan dan maiah chuan Afghanistan, Bangladesh leh Pakistan-a sakhaw tênau zawk zuitute'n an sakhua vanga harsatna an tawha India rama rawn tlu lutte lo chhawmdawl a, khua leh tuia lo pawm theihna tura puan-in zauhnaah a ngaih theih thu a sawi.

Dan siamṭhat tumna chu sakhaw tih bik emaw, ram anga thliar bik emaw nei loa ṭhenawm rama sakhaw tênau vuantu zawng zawngte tana hamṭhatna siamsakna tumna a ni lo tih a chian thu sawiin R Lalzirliana chuan, "Myanmar rama Rohingya Muslim te, China rama Uyghur Muslim-te leh Pakistan-a Ahmaddiya Muslim-te telh an ni ve si lo hian ngaih a ti ṭha lo ang reng hle a ni," a ti.

Home Minister chuan, sakhaw thlan bik leh hmaih bik nei zawnga hmalakna chu secular state kalh tlat a nih thu sawiin, "Chuvangin, June 12, 2018-a Council of Minister ṭhukhawm chuan sorkarin he dan tihdanglam a tumna hi resolution siamin, duh lohna a lo au chhuahpui tawh a ni," a ti a; Citizenship (Amendment) Bill, 2016 chu a nihna ang ngau ngau chuan an duh lo tihlanna atan resolution pass pui turin member-te a sáwm a ni.