KHAWTHLIR

Tanpuina hlân
Rapid Response, Mizoram chuan nimin khan Sairang community hall-ah kumina Tlawng lui lian tuarte chhawmdawlna an hlan a; chhungkaw 15 leh huan thlai chán chhungkaw 30-te hnenah buhfai leh ei tur an pe. Rapid Response hi kum 2013-a Uttarakhand tuilian aṭanga ṭanpui hna thawk tura din a ni a, an hmunpui chu Puducherry-ah a awm.

Thisen pe
Armed Veng Bial KṬP chuan an bial silver jubilee lawm nan nimin khan blood donation camp an huaihawt a, KṬP member mipa 52 leh hmeichhia 12-te'n Aizawl Civil Hospital tan thisen unit 64 an pe.

ZPM thalai
Zoram People’s Movement (ZPM) general headquarters ṭhalaite chuan kum 2018-19 chhunga hruaitute nimin khan ZNP pisaah an siam rem a; chairman-ah V Lalṭhazuala, vice chairman-ah Saiṭhuama, vice president-ah Lalṭanpuia Zote, H Lalremtluanga, Laldawngliana leh Vanlalnghaka, treasurer-ah H Vanlalhuma te an ni. Adviser panga leh general secretary 10 an ruat bawk.

Free Health Mela
Health department, PHFI, DoNER bultumin vawiin hian Serchhip Auditorium-ah Cancer & NCD Screening Mela (Health Mela) neih a ni dawn. Mela-ah hian skin, medicine, surgery, eye, ENT, oncology, ortho, psychiatry, dental, pathology, paediatric, endoscopy, cardiology, etc. ah doctor ràwn theih a ni ang.

DC-in tlawh
Kolasib DC Dr Arun T chuan nimin khan Thingdawla Nursing School a tlawh a, thawktute chu harsatna an tawh hrang hrangte a sawipui. Thingdawl Nursing School-ah hian General Nurse & Midwifery course a zir theih a, tun dinhmunah principal nen staff 10 leh zirlai 20 an awm a ni.