Kuminah PRRS vangin vawk 3,099 thi tawh

AH&Vety minister C Ngunlianchunga chuan, PRRS vangin kumin chhungin Mizoramah vawk 3,099 an thih tawh thu a sawi a, "PRRS-in min chàmchilh mek a, he natna ûmbo tur hian mithiamte hriatna mai bakah, vawk vulhtute'n kan remhriatna nen ṭan kan lak a ngai a ni," a ti.

June 27, Nilainia Mizoram Pig Producers Cooperative Federation (PIGFED)-in Vety Polychilic hall-a Annual General Assembly vawi 25-na an hman a hmanpuinaah C Ngunlianchunga chuan, "Vawk notê leh vawksaah intodelh tuma sorkarin ṭan a lak lai mekin vawk natna hri PRRS hi kum 2013, 2016 leh 2018-ahte a lêng a, vawk eng emaw zatin an thihpui tawh a, kuminah pawh vawk 3,099-in an thihpui tawh a ni," a ti a; PRRS chu vawk vulha eizawngte'n an tawrh nasat thu a sawi.

AH&Vety Minister chuan, PRRS tihrêm dan turah mithiamte'n ngaituahna an sen nasat thu a sawi a, "Vawiin thlengin he hri hian min la kiansan thei lo. PRRS ûmbo tur hian mithiamte thiamna piah lamah Pathianin finna min pek kan hman ṭangkai pawh a ṭul hle a ni," a ti.

PIGFED hi June 6, 1989-ah din a ni a, affiliated soceity 184 awmin, member 5,000 chuang an awm mek. Share capital cheng nuai 100 an nei a, sorkar share chu cheng nuai 12.25 niin, society share chu cheng nuai 9.70 a ni.

Report-a an tarlan danin, kum 2017-18 chhungin vawkpui 3,778 kah rai a ni a, chuta ṭang chuan vawk notê 15,692 thar a ni. Kum 2017-18 chhung hian PIGFED chuan Rs. 20,46,943.72 an hlep a ni.