MAAMSTA-in provincialise an beisei

Mizoram Adhoc Aided Middle School Teachers Association (MAAMSTA) chuan thuchhuah siamin, Mizorama adhoc aided middle school-te ni mekte chu tun sorkar hun chhungah ngei an vaia sorkarin a lak (provincialise) an beisei thu an tarlang.

MAAMSTA chuan, chief minister Lal Thanhawla kaihhruai Mizoram sorkarin zirna kawnga hma a laknate chu lawmawm an tih thu tarlangin, "Kan sorkar chungah lawmthu kan sawi a, hun lo kal zel turah pawh beiseina sang tak kan nei a ni," an ti a; CZS Higher Secondary School, Kolosib, adhoc aided aṭanga dinhmun ṭha zawk, provincialise-a a dah chu lawmawm an tih thu an sawi.

Sorkar hmalaknaah lawmawm an tih thu an sawi rualin MAAMSTA chuan, sorkar chungah beisei dang an neih thu an tarlang a, "Mizorama adhoc aided M/S-te hi elementary school kan nihna anga min ngai pawimawh a, tun sorkar chhungah ngei a bo a bâng awm loa min provincialise ve ngei turin kan sorkar chak tak hi kan beisei a, kan beiseina hi min tihhlawhtlinsak ngei kan ring," an ti.