MiMIR hmanga inelna tur inhrilhfiah

NEDP hnuaia project duan, 'My Project, My NEDP–Mipui Mamawh Inṭâwm Ruahmanna' (MiMIR) hmanga inelna buatsaih tur chungchang inhrilhfiahna hun nimin khan Serchhip DC Conference Hall-ah neih a ni a; Serchhip district-a MiMIR member-secretary R Vanrengpuia, SDO(S)-in kaihruaiin, district chhunga khua/veng tina joint committee aiawh mi pahnih an tel.

Serchhip additional DC Chuauhnuna chuan, MiMIR inelna chu thluak hmanga inelna a nih thu sawiin, mahni khawtlang tana ro tling tur ngaihtuah chhuah tum turin kal khawmte a chah a, "Hriatreng tlak thil ṭha, khawtlang hmangaihna lan chhuahtirna hun remchang tak a ni," a ti.

Serchhip DLAO Neng Thianlal-a'n MiMIR project siam dan tur a sawifiah a, khua leh veng tina V/C-te kaihhruaina hnuaiah tlawmngai pawl pathum–YMA, MUP leh MHIP aṭangin mi pahnih ṭheuh telna Joint Committee siam tur a nih thu leh, Joint Committee ruahmannain MiMIR project concept paper siam tur a nih thu a sawi.

MiMIR project siam chu Joint Committee-in form (proposal paper) siam sa hmangin July 16, 2018 aia tlai loah mahni district-a member secretary-te hnenah thehluh tur a ni a; district tina project ṭha ber khua/vengte hnenah hna thawhna tur cheng nuai 100 pek tur a ni.