Sum dinhmun ṭha lo vanga sorkar tihmualpho tum an awm - MNF ṭhalai
Mizo National Youth Front (MNYF) chuan, Mizoram sorkar sum dinhmun a ṭha lo tih an tarlang a; tun hnaiah political party ṭhenkhat aṭangin sum chungchangah sorkar bei an awm
ṭhin tih sawiin, "Sorkar puih tum chuang si loa sorkar beih leh tihmualpho tum ringawta ngaihtuahna séng an awm hi pawi kan ti a, kan dem hle a ni," an ti.
MNYF chuan June 13, Inrinni khan thuchhuah siamin, "Covid-19 avangin khawvel sorkar hausate pawh an sum dinhmun a nghawng nasa a, ei leh bar, sumdawnna leh eizawnna hrang hrang nghawng loh aram a nei lo. Chuti chunga tun thlenga ei leh bara harsaa kan la awm loh chhan chu chief minister chhuanawm tak, finance minister ni bawk Pu Zoramthanga ruahmanna fel vang a ni," an ti a; chhuanawm an tih thu an tarlang.
Mizoram sorkar flagship programme hnuaia hmalakna lian ber tura ngaih chu mau a ni tih sawiin MNYF chuan, hripuiin khawvel nuai mah se, economy dâwm kânna tur ngaihtuah a ngai tih an sawi a, "India pawhin Atmanirbhar Bharat a duang chhuak a ni. Chief Minister pawh hian huaisen takin economic policy tihhlawhtlinna atan mauah hma a la a, fakawm kan tiin chhuanawm kan ti hle," an ti.