Zirlaite tan Special Scholarship Scheme Kan siam dawn - MNF Vice President

MNF vice president Dr R Lalthangliana chuan, MNF a sorkar chuan Mizo zirlaite tan Mizoram Special Scholarship Scheme siam an tum thu a sawi.

Dr R Lalthangliana hian July 28, Inrinni khan Ngharchhip, New Ngharchhip leh Thingsai khuaahte vantlang inkhawmah thu a sawi a; Thingsaia thu a sawinaah, "MNF a sorkar chuan Mizo zirlaite tan Mizoram Special Scholarship Scheme siam kan tum. Chu scholarship hmang chuan lehkhathiam tam tak, khawsak harsa zawkte kum tin mi 100 vel thlang chhuakin, hmun danga an zirna tur senso tumsak an ni ang," a ti.

MNF a sorkar hunah nasa takin sawhthing an buaipui dawn nia sawiin R Lalthangliana chuan, "Hmun hrang hrangah a leina hmun tur leh lakna tur point fel tak kan siam dawn," a ti a; sawhthing buaipui dan tur ruahmanna fel tak an siam tawh niin a sawi.

MNF Vice President chuan, Mizoram chu kum khat leh thla chanve chhungin vawi hnih a fang chhuak tawh nia sawiin, "Kawng chhe lai ber berte pawh ka tlawh chhuak vek tawh. Kawng chhe award pe dawn ila, Thingsai leh Cherhlun inkar hi a tel ngei ang," a ti. MNF sorkar laiin PMGSY hmangin Cherhlun-Thingsai kawng laih ṭan tumin hma an la nia sawiin, "Lungkawlh thleng kan blacktop a, kan sorkar a tawp hnu khan sorkar thar khan a ngaihthah hle a ni," a ti bawk.