ZMC-in swab sample test sawifiah

Zoram Medical College (ZMC) chuan thuchhuah siamin, laboratory-a swab sample endik chungchang an sawifiah a, "Hun rei lo têah tun aia tam zawk test thei turin hmalak mek a ni," an ti.

ZMC chuan, April 7, 2020 aṭangin RTPCR hmangin swab sample endik a nih thu tarlangin, "Sample 3,906 chuang test a ni tawh. Tun hnaiah hian sorkar thuthluknain quarantine facility-a awm mek, chhuak tawh zawng zawng leh lo haw apiangte chu RTPCR hmangin an sample test tur a ruahman a ni. Amaherawhchu, quarantine facility-a awm mekte aṭanga sample lak bakah hian, sample test tur awmsa (backlog) a la awm avangin duh angin test a chak thei lo deuh," an ti.

ZMC tarlan danin, Institute of Bioresources & Sustainable Development aṭangin RTPCR kháwl thar neih (hawh) belh a ni a, SDRF sum hmangin automated RNA extractor lei a ni bawk. Khawlte hi hman theih tura rua­hman (caliberation) leh enchhin phawt (test run) a ngai a, bun fel tak tak a nih chuan, sample tam zawk endik a ni ang.

Chutih rualin, kháwl hman tur reagent hrang hrangte chu a leina hmun aṭangin tam tham tak vawi khatah lei theih a ni lo a, chuvang chuan RTPCR test chu tun dinhmunah duh anga tam tih theih a ni rih lo. Tunah hian ni khatah sample 400 chuang endik a ni ṭhin a, chu aia tam zawk endik theih thuai beisei a ni.