Pawngsual duh lohna kawng zawh
Siaha District Child Protection Unit, Siaha Auto-Rickshaw Owners Association, Siaha SP Office leh World Vision India-te'n July 28, Inrinni khan Siaha-ah naupang pawngsual leh khuaikhem dona kawngzawh an huaihawt.
Kawng zawh ṭan hmain inkhawm tâwi neih niin, Siaha DCPO-a protection officer Malsawmtluangi Pachuau-in a kaihruai a; DCPO Dr David Zaitinvawra'n naupang pawngsual dona kawng zawh buatsaih a nih chhan sawiin, "India ram mai ni loin, Mizoram leh Siaha district-ah ngei pawh naupang pawngsual a hluar tâk êm avangin he rally hi buatsaih a ni," a ti.
Siaha additional SP F Lalbiakzauva chuan, naupang pawngsual dona kawnga DCPU-te hmalakna a fak a; an theih ang anga ṭawiawm turin mipui a sáwm. Rally-ah hian Siaha khawpuia auto-rickshaw 100 chuangin mipat hmeichhiatna kawnga naupang khawih chhiat duh lohna lantir nan kawng an zawh a, an lirtheiah naupang pawngsual duh lohna thuziak hrang hrang leh flag-te tárin, Siaha khawpui chhung an fang chhuak a ni.