NLUP semtu Congress sorkar a nih avangin Party dang tan sem ngaihna a awm lo- CM

Chief minister Lal Thanhawla chuan tun hnaia ruling MLA-te leh Congress party mi, kum 2013 inthlana tling lote NLUP dawng tur thlang tura tih an nih thu sawi a nih chungchangah, "Party dang tan sem ve ngaihna a awm lo," a ti.

Nimin khan Congress Bhavan-ah thu sawiin Chief Minister chuan, "NLUP hi a semtu chu Congress sorkar a nih miau avangin party dang tan sem ngaihna a awm lo," a ti a, Congress party mi palite chu a thlangtu tur ruattute niin, a semtu an ni loh thu a sawi.

Lal Thanhawla chuan, NLUP chu mimalin an sem ngai lo tih sawiin, "Bial tinah a thlangtu an awm. Ka bialah pawh tute nge dawng ka hre miah lo. MNF-te'n NLUP chu ṭha an tih hle a, a semtu nih ve an châk a, a lawmawm hle. An sem ve châk a nih chuan Congress party-ah lut mai se," a ti.

Ṭangrual Pawl ZPM-in an sorkar hunah sawhthing kg. khat Rs. 50-a an lei tur thu an sawi chungchangah CM Hawla chuan, "Kuthnthawktute an hmangaih tak tak a nih chuan Rs. 50-a lei theih dan chu min hrilh mai se, keini'n kan lei mai tur a ni," a ti a, ZPM chu kut hnathawktute hmangaih derah a puh.

Zo Carbon leh Mizoram lottery chungchangah Lal Thanhawla chuan, "Zo Carbon case-ah kan hming a lang ve a, mahse, Court-in a paih tawh. Zo Carbon leh Lottery-te hi CBI chhuitir an ngen a, May 2107 khan Chief Secretary-ah chhuitir turin ka thlen a ni. CBI-in an rawn ngaihven a, Zo Carbon chu an inrawlhna tlakah an ngai lo," a ti. Lottery chungchangah chuan, CBI an la ngawi reng rih a, chhui tlakah an ngai lo a ni mai thei niin a sawi.

Lal Thanhawla chuan, lottery chu India rama pali/panga vel chiahin an kalpui tawh tih sawiin, "Kan la tih chhan chu state sorkar tana sum lak luhna a nih vang a ni. MNF-in an sawi viau chhan hi chu, an duhsak zawngte'n an chan theih loh vang a ni," a ti.

Chief Minister chuan, eng sorkar pawh kum nga an sorkar chuan miin an ning ṭhin tih sawiin, "Keini chu inthlan vawi hnihnaah kan pung zawk. A vawi thumnaah hian a hma aia tam pawh tling thei kan ni. Sorkar lai ninna boruak a awm miah lo a, a lawmawm," a ti a; an party chhungkaw thawhhona ṭhat vang niin a sawi.

MNF party-te'n Congress sorkarah eirukna leh thil dik lo lian tham an zawng ṭhin a, mahse, an hmu lo nia sawiin Lal Thanhawla chuan, "An pute anga eiru turah min ngai a ni mai thei. Eng emaw ti tala min sawi bawrhbân an tum a, an thei lo. Eiruknaah kan hotute an fihlim avangin an au rin poh leh an beidawng nasa mai dawn a ni," a ti.

MPCC President chuan inremna tihhlawhtlin phuta chaw nghei mek MURA-te chu MPCC nena an thawhhona thuthlung aia tam sorkar hotute'n an tihsak tawh tih a sawi a, "Hetianga inenkawl hi thil har tak a ni. Mahse, kan hotute'n inhriatthiamnain an sawipui tawh a, thuthiam hlen tawhin an inhria," a ti a, inremna piah lam pawh an tihsak ṭeuh tawh thu a sawi.