Court-in buhfai tichingpentu Kum khat táng turin a hrem

Food, Civil Supply & Consumer Affairs (FCSCA) department sub-inspector (SI) ṭhin K Rokunga chu sorkar buhfai a tihchingpen avangin Aizawl District & Session Court-a special judge (PC Act) Thang Lianmang Guite chuan kum khat chhung jail-a táng tur leh Rs. 10,000 chawi turin a hrem.

Court order-a tarlan danin, K Rokunga hi July 20, 2009 aṭanga September 23, 2010 chhungin FCSCA hnuaiah Ngopa Sub-Distribution Centre (SDC)-ah sub-inspector niin, Ngopa SDC kudam enkawltu ber a ni a; he hna a thawh chhung hian buhfai tichingpenah puh a ni.

Anti Corruption Bureau (ACB) chuan FIR an dawn bawhzuiin K Rokunga puh a nihna chu an chhui chiang a, buhfai quintal 930, cheng nuai 53.62 man a tichingpen tih hmuhchhuah a ni.

Special Court chuan K Rokunga thubuai chu ṭum eng emaw zat a ngaihtuah hnuah tun hnai khan thutlukna a siam a, K Rokunga chu a hriselna dinhmun a ṭhat loh avang leh sum a tihchingpente a rulh leh avangin, hrem theihna nêp ber, kum khat chhung táng tur leh Rs. 10,000 chawi turin a hrem ta a ni. Sum a chawi tur hi a pek loh chuan thla khat dang a tàn belh ang.