Sorkar leh tur chu MNF chauh a ni tawh - Zoramthanga

MNF president Zo­ram­thanga chuan, June 28, Ningania Mizoram Assembly session hnu­hnung ber neih zawh a nih rualin Congress party-in an sorkar term chu an bye bye ta niin a sawi a, "A dawt leha sorkar tur chu MNF chauh a ni tawh," a ti.

Nimina Zemabawka Lalhmingthanga ina mi thar lawm luhna inkhawmah Zoramthanga chuan, "Congress rorelna hun tawpna chhan tur chu, an rinchhan ber sorkar laipuiah an tlachhe vek tawh a, state inthlan zawng zawng Punjab tih chauh loah chuan an tlachhe vek a, Mizoramah pawh an tla ve tawh ngei ngei ang," a ti a; Congress chu Pathian leh kohhran pawi an sawi avangin an tla dawn niin a sawi.

Congress-te chuan nuihza siam nan kohhran an hmang nia sawiin Zorama chuan, "Kohhran ṭawngṭai chhanna chu zu zawrh hi a ni, an ti a. Pastor pakhat pawhin, 'Kan sorkar zu zawrh hi hmeithai leh fahrah siamna khawl a ni' a ti hial. Zu zawrh vangin police 500 chuang leh mipui 5,000 chuang an thi tawh a, a rapthlak em em a, hei chauh pawh hi sorkar tlakna chhan tur a ni," a ti.

MNF President chuan, MNF sorkar hunah khawpuia chêng hlun tawh, in hmun la nei lote tan sorkar ram a ni emaw, mimal ram pawh a remchang ang zelin in hmuna pek theihna tura hma an lak dawn thu a sawi bawk.

MNF thuchhuah chuan, nimina Zema­bawka inkhawmah hian Congress party aṭangin mi 40, ZPM aṭangin mi 37 leh neutral mi 23, an vaiin mi 100 chu Zoramthanga'n MNF-ah a lawm lut niin a tarlang.