KHAWTHLIR

Paulians’ Day
St. Paul’s Higher Secondary School leh Paulians Alumni-te chuan nimin khan St.Paul's HSS-ah Paulians’ Day an hmang a, St. Paul's HSS-a Class of 1993-te khuallian an ni. Paulians' Day-ah hian Class of 1993 batch-a mi, thi tawhte sûnna hun hman a ni a, career guidance neih nghal a ni bawk.

Thisen pe
Durtlang Higher Secondary School-te chuan nimin khan Synod Hospital-ah thisen unit 24 an pe a, a petute mipa 19 leh hmeichhia panga an ni. Lawngtlai-Aizawl daxicab driver-te pawhin nimin khan Lawngtlai District Hospital-a thisen unit 9 an pe bawk.

Heroin man
Champhaia Excise & Narcotics department-te chuan nimin chawhma dar 11:30 khan Champhai Zotlang, Ṭiau road-ah heroin gram 17.3 leh a neitua puh Lalhmunsanga (32) s/o Haukhuma, Chawngtlai nia inchhál an man. Lalhmunsanga hi The Narcotic Drugs & Psychotropic Substances Act, 1985 tlawhchhanin thubuai siamsak a ni.

Education Week
Khawhai Students Union chuan June 26-29, 2018 chhung khan Khawhaiah Education Week 2018 an hmang. Education Week-ah hian Khawhai bakah, Tuichang bial chhunga zirlai pawlte leh zirna-in hrang hrangte tan intihsiakna an buatsaih a, kumin HSLC leh HSSLC-a first division chin chung lama pass-te lawmpui nan Rs. 3,75,000 an sem bawk. Week hi June 26-ah bialtu MLA Lalrinliana Sailo-in a hawng a ni.

Kum 14 táng turin ti
Hmeichhe naupang hnute leh mal khawi­h­saktu Zohmingthanga (52), Khawzawl Veng­thar chu kum 14 chhung hrehawm taka jail-a táng turin Champhai Special Court-in a hrem. Court thuremnaa a lan danin, Zohmingthanga hian June 2015 thla laihawl vel khan hmeichhe tleirawl kum 15 mi chu a khawih avangin naupang khuaikhem siamsak a ni a; a chungthu ngaihtuah chhunga jail-a a lo tàn tawhnate chu a tàn hun chhung turah telh tur a ni thung.