Serchhipah NCD inzirtirna hun buatsaih

Ministry of DoNER bultumin Health department, Public Health Foundation of India leh National Health Mission ṭangkawp chuan nimin khan Serchhip Audito­rium-ah cancer leh non-communicable disease (NCD) inzirtirna leh zawn chhuahna hun (Health Mela) an buatsaih a, Health minister Lal Thanzara'n a hmanpui.

Inkhawm hi Serchhip DC Sangchhin Chinzah-in a kaihruai a; Health Minister chuan, cancer leh NCD natna hrang hrangte kai lo turin nunphung thlak danglama a ngai tih sawiin, "Nun dan phung tlema tihdanglam hlekin cancer, HIV/AIDS, thisen sang leh zunthlumte lakah awlsam takin a inven theih a ni," a ti.

Zûk leh hmuam, ruih theih thil leh mipat hmeichhiat hman dik lohna chu Kristianna nena thil inpersan, kalsan ngam tur thil a nih thu sawiin Lal Than­zara chuan, "Ei tur tui leh hmuihmer lam aia ei tur hrisel leh thianghlim lam zawng zawk tawh tur kan ni," a ti a; sorkarin hriselna lama hma kan sawn theihna tura hma a laknate a sawi lang.

Mizoram NCD nodal officer Dr Eric Zomawia'n cancer leh NCD lama Mizoram dinhmun tlangpui a sawi a; natna inkai chhawn theih lohte laka inven dan hrang hrang a sawifiah.

Public Health Foundation of India hotu Dr Priscilla C Ngaihte pawhin thu sawiin, "Zo hnahthlak nih hi chhuan tham a nih mek laiin, cancer leh natna inkai chhawn theih loh hrang hrangah India ramah pakhatna kan hauh tlat si a. He hminghliauna hi kan nuaibo a, hnam fing leh puitling, entawn tlak kan nihna kan tihlan a ṭul a ni," a ti.

Health Mela hawnna in­khawm zawhah mipui tan a thlawna inentirna buatsaih a ni a, doctor 28, line hrang hrang chi 13-a thiamna bik neite'n inentirna dawhkan 37-ah a thlawnain damlote hriselna an endik a ni.