Lottery titawp turin Finance Minister ngen

MNF Vigilance Committee vice chairman L Thangmawia leh MNF hruaitute chuan June 28, Ningani tlai dar 4:30 khan Finance minister Lalsawta chu a pisaah an hmu a; Mizoram state lottery chu dik lo taka kalpui nia an ngaih avangin titawp nghal turin an ngen.

MNF hruaitute chuan Finance Minister hnenah hian, CAG Report 2016-ah, kum 2012 - 2014, kum thum chhunga Mizoram sorkarin lottery a kalpui dan dik lo tak leh mipui tana ṭangkai zawk tura kalpui a nih thu tarlan a ni tih sawiin, "Heng kuma lottery kalpui ang chiah hian kum 2015 - 2017, kum thum dang chhungin dik lo taka kalpui tura sorkar mi duhsakte chu rapthlak khawpa duhsak an ni tawh chung leh May, 28, 2018-a an hun pawhseisak leh a ni hi Mizoram mipui zah lohna lian tak a ni," an ti.

MNF-in lottery agent/distributor-te term tawp tawha pawhseisak nawn lehah leh tender kalpui danah dik lo a awm nia an tarlante chu - tender tihfel a nih hma chuan lottery agent/distributor ṭang laite'n an kalpui chhunzawm reng ang, tih leh, tender chhuah aṭanga kum thum kal ta chhungin thla 12 tal India ramah lottery agent an ni tur a ni, tihte a ni.

MNF thuchhuah chuan, lottery agent-te term tawp tawhte chu titawp nghal tur leh tender kal lai pawh sût turin sorkar an phût tih sawiin, "Tuna mite chauh ni lo, firm dangte pawhin an chhan ve theih tur tender chhuah leh turin sorkar kan phût a ni," a ti a; an ngenna tihlawhtlin a nih loh chuan a tàwp thlenga an do tur thu an tarlang bawk.