Private hospital-te'n thisen an lâk dana Sorkar ruahmanna thar ṭha an ti lo
Non Government Hospital Association of Mizoram (NGHAM) chuan thuchhuah siamin, Mizoram sorkarin damlo thisen pek ngaite blood bank aṭanga thisen lak dan kalphung thar a siam chu damlo thisen mamawhte tan ṭha lo an tih thu an tarlang.
NGHAM chuan, private hospital-te'n an damlo, thisen mamawhte'n Aizawl Civil Hospital aṭanga thisen an lak dan tura ruahmanna thar a siam chu nunna derthâwng taka awm tan a ṭha lo hlea an ngaih thu an sawi a, "Director, Hospital & Medical Education kaltlanga lak a ngai hi a kawng a thui a, damlo leh an chhungte tan harsatna nasa tak a siam a ni," an ti.
Private hospital-te chuan, "Hospital-te mamawh ni loin, damlo mamawh a nih avangin thisen lak dan hi a awlsam thei ang berin damdawi-in thliar hrang loin siam leh thuai ni se kan ti," an ti a; thisen chu nunna chhanna a nih avangin tumahin a ṭul loah an dawng lo tih an sawi.
Private hospital-te leh sorkar an la inrem theih loh vanga damlo mangang, damdawi-ina awm ngai tam zawkin medical reimbursement leh Mizoram State Health Care Scheme an chhawr thei rih lo chu pawi an tih tak zet thu sawiin NGHAM chuan, "Sorkar in kan ngenna min tihhlawhtlin hmaa harsatna tâwkte hriatthiamna kan ngen a ni," an ti.
Sorkar thuchhuah dang pakhat No A.17017/1/2014-HFW/39-ah damlo, Mizoram pawn damdawi-ina enkawlte a bá (credit)-a enkawl theih lohna damdawi-ina enkawlte chu ‘Notified rate ang hian reimburse an ni ang' tih a nih thu sawiin NGHAM chuan, "NGHAM member hospital-te ngenna hi hetiang tho hian 'Damlote'n notified rate angin an reimburse ang' ti turin sorkar kan ngen a ni," an ti a; Mizoram páwna tih theih reng, notification pawh awm sa ang chu Mizoram chhunga damdawi-inah pawh sorkarin hmang ve mai se ṭha an tih thu an tarlang.
NGHAM chuan, harsatnate sutkian a nih thuai theih nan NGHAM chu sorkar thuneitute nen inbe turin an inhawng reng tih an sawi bawk. NGHAM member damdawi-in hotute chuan nimin khan sorkarin thisen lak chhuah dan thar a siam chungchang an sawiho a; chutah chuan Mizoram hmun hrang hranga damdawi-in 17-a hotute an tel a ni.
NGHAM member meeting-a telte
1. Synod Hospital
2. Bethesda Hospital & Research Center
3. Adventist Hospital
4. Aizawl Hospital & Research Center
5. LRM Hospital
6. Ebenezer Medical Center
7. Greenwood Hospital
8. Grace Nursing Home
9. Care Hospital
10. City Hospital
11. Rosewood Hospital, Aizawl
12. Redeem Hospital
13. Mercy Hospital, Serchhip
14. John Williams Hospital, Lunglei
15. Nazareth Hospital, Ramhlun
16. Maraland Gospel Centenary Hospital
17. DM Hospital, Champhai