Serlui Bialtu MLA-in ramri a tlawh

Serlui bialtu MLA Lalrinsanga Ralte chuan November 26, Ningani khan a bial chhung Saipum leh a chhehvela Mizoram leh Assam inrìna vela Mizoram sorkar hmalaknate a tlawh.

Lalrinsanga Ralte chuan, ram leh hnam humhalh a, venghim zel turin Zoramthanga kaihhruai sorkarin theihtawp chhuahin hma a la zel nia sawiin, "Ramri hrûla mipuite'n harsatna an tawhte sukiang turin a theih chin chinah hma kan la chhunzawm zel dawn a ni," a ti a, Saipum ramri hrûla kawng laihte chu hmun pangaah km. 32 vel a nih thu a sawi.

Ramri bula kawng laihte chu a bula khaw mipuiin ṭangkai zawka an hman theih nan chei hnûma enkawl zelna tur ngaihtuah mek a nih thu sawiin MLA chuan, "Kan ram humhalh a, venghim tura kan CM inpekna, hmalakna leh huaisenna a fakawm hle. Ramria hmasawnna hna thawh kawnga chawimawi tur an awm a nih chuan CM bak an awm lo," a ti.

Lalrinsanga Ralte hian Saipum ram chhunga kawng laih a en hnuah police duty post a tlawh kual a, tuizem pathum leh an chawhmeh man tur pawisa a pe a ni.