Sum hmuh tur vbc. 2,800 hmu lo anga CM-in a sawi hi dâwt a ni - ZPM Ṭhalai

Zoram Peoples' Movement (ZPM) Ṭhalai hruaitute chuan nimin khan Aizawl Press Club-ah thuthar thehdarhtute an kâwm a; chief minister Zoramthanga'n Covid-19 avangin Mizoramin sum a hmuh tur cheng vbc. 2,800 a hmu lo angin a sawi tih sawiin, "CM thusawi hi dâwt a ni," an ti.

ZPM Ṭhalai hruaitute chuan, CM Zoramthanga'n November 5, 2021 khan nikum chhungin hripui lêng avangin Mizoramin sorkar laipui aṭanga a dawn tur cheng vbc. 2,800 a dawng lo tih a sawi thu an sawi a, "Mizoram sorkar account report Monthly Key Indicator-a a lan danin, CM thusawi hi belhchian dâwl lo, mipui bum tumnaah kan ngai," an ti a; Monthly Key Indicator-a a lan dan chuan, provisional-a Mizoram sum hmuh chu cheng vbc. 1,000 chuangin a tam zawk thu an sawi.

Kum 2020 khan hripui a lèn hma, February thla laihâwlah budget session neih a nih thu sawiin ZPM ṭhalai hruaitute chuan, "Sum tamzia hlir kan ngaithla a nih kha. Tuna taka cheng vbc. 2,800 kan chànna lai tak hi eng laiah nge tih hi kan zawhna a ni. CM hi Covid-19 avanga January 2020 aṭanga central aṭanga pawisa hmuh tur chán ṭeuh anga a insawi hi dâwt a ni. Covid-19 vangin central sorkar hi March 2020 aṭangin a inbuatsaih ṭan chauh a ni," an ti.

ZPM Ṭhalai hruaitute chuan, Finance minister leh Chief Minister Zoramthanga'n sum a enkawl thiam avangin harsatna tam tak Mizoramin a pumpelh thu MNF adviser C Lalrinsanga, minister-in a sawi tih tarlangin, "Thu awihawm loh leh mipui hruai sual tumna lian tak niin kan ngai. Kan sum hmuh tur leh hmuhte ngaihtuah loin, budget provision-a tel lo thawh a awm fo avangin harsatna lian kan neih belh thung," an ti a, supplementary demand tam tak a awm ṭhin thu an sawi bawk.