KHAWTHLIR

ABC inkhawmpui
Baptist Church of Mizoram (BCM)-a inkhawmpui lian ber dawttu, Area Baptist Council (ABC) inkhawmpui chu ABC 15-ah ṭan a ni a, Pathianniah a ṭiak ang. ABC tam zawkah chuan vawiin Inrinni hian rorel inkhawm neih a ni dawn a, naktuk Pathianniah kohhran upa tharte nemngheh a ni ang.

Heroin man
Excise & Narcotics department (END) chuan nimin chhun khan Durtlang Leitanah heroin gram 27 (hawng 2) leh a neitua puh Lalbiakzauva (41) s/o Ngursawii (L), Durtlang Leitan nia inchhál an man a; November 25, Ningani chawhnu dar 2:30 khan Venghluiah heroin gram 129 (hawng 10) leh a neitua puh - Lalchungnungi (42) d/o Hauchhunga, Venghlui leh Lalhmingmawii (53) d/o Thangkunga, BSUP Building, Lawipu nia insawite an man bawk.

MSEA inkhawmpui
Food, Civil Supplies & Consumer Affairs department-a storekeeper aṭanga additional director thlenga inzawm khawm páwl Mizoram Supply Executive Association chuan nimin khan Taxation auditorium-ah inkhawmpui an hmang a, FCSCA director Ramdinliani'n a hmanpui.

Iconic Week
Aizawla Food Corporation of India (FCI) Divisional Office chuan nimin khan Azadi Ka Amrit Mahotsav pualin Hotel Regency-ah Iconic Week an buatsaih a, Food, Civil Supplies & Consumer Affairs minister K Lalrinliana'n a hmanpui.

Minister-in hawng
Minister of state Lalruatkima chuan nimin khan Serchhip DC conference hall-ah Computerization of Registration, National Generic Documentation System a hawng. Computerization of Land Registration hi sorkar laipui hmalakna a ni a, a software chu One Nation One Software tura duan a ni.

Minister-in enfiah
Minister of state Dr K Beichhua chuan nimin khan a bial, Siaha khawpuia DC pisa leh Siaha Vaihpi community hall sak mek te, Mara Weaving & Handloom Centre sakna tur hmun leh ECM KTP Headquarters-in Tisopi kawnga Siaha Youth Centre an sak mekte a tlawh.

SHC EM thar
Nimin khan Sinlung Hills Council executive member (EM) atan New Vervek bialtu C Lalnuntlanga, Ratu bialtu H Lalengzauva, Vanbawng bialtu Ricky Lalremsanga leh Sakawrdai South bialtu Remruata Varte te chu rinawmna thu tiamtira lak luh an ni.SHC-ah hian chief executive member Lalthlamuana Hmar-in November 10, 2021 khan a nihna a bànsan avangin SHC sorkar hi siam thar a ni a, CEM-ah deputy chairman ni lai Biaknunga lak luh a lo ni tawh. SHC-ah hian elected member 12 leh nominated member pahnih, an vaiin member 14 an awm a ni.

Thisen an pe
Nimin khan Serchhip HSS leh Champhai HSS-a NSS unit-te'n an awmna District Hospital-ah thisen unit 66 an pe a, petute mipa 49 leh hmeichhia 17 an ni a, Serchhip HSS zirlai 40 leh Champhai HSS zirlai 26 an ni. ECM KTP, Tisi Pastor Bialte'n Theiri-ah Siaha District Hospital tan thisen unit 37 an pe a, petute mipa 33 leh hmeichhia pali an ni. KṬP, Salem Veng Branch-in an kohhran hall-ah Aizawl Civil Hospital tan unit 33 pein, petute mipa 26 leh hmeichhia pasarih an ni a; KṬP, Tuithiang Vengchhak Branch pawhin an din champha pualin Synod Hospital tan unit 11 an pe a, petute mipa pakua leh hmeichhia pahnih an ni.