Surveyor Training Institute sawipui

Surveyor Training Institute (STI), Hualngohmuna din leh a hmunhma chungchangah Land Revenue & Settlement (LRS) minister Lalruatkima chuan November 25, Ningani khan a pisaah Hualngohmun khawtlang hruaitute a kâwm a, sorkar thawhpui turin a sáwm. STI hi cheng vbc. 54.9 hmanga sak tum a ni.

Lalruatkima chuan, STI chu Hualngohmuna sakna turin Mizoram sorkarin Planning department kaltlangin Ministry of Science & Technology-ah November 12, 2021 khan concept paper a thehluh tawh thu sawiin, "Dilna thehluh hma hian keima'n ministry ka dàwr lâwk tawh a, a hlawhtlin ngei pawh ka beisei," a ti a; Hualngohmun VC-in kum 2008 khan sorkar hnenah ram bigha 24.22 a lo hlan tawh tih a sawi.

Minister chuan, "Directorate level leh khawtlang aiawhte'n thu delhkilh siamin, hun bituk chhunga hmalakna a awm loh chuan ram neitu hnenah hlan leh ni se tih a awm a, inremna a lo awm tawh avang hian a hmun thu hlaah Revenue department chu thuneitu ni mah se, khawtlang hruaitute ràwn hmasak a pawimawh hmasaah kan ngai a, rem min tihpui ngei ka ring a ni," a ti.

Hualngohmun khawtlang hruaitute chuan, STI chu din ngei ni se an duh thu sawiin, "Kum 2008 hnu lamah hmalakna hmuh tur awm loa chawlhsan vang vang ang kha chu a thlen kan remti lo," an ti a, khawtlang anga sawiho leh an tum tur thu an sawi.