Agarbatti stick unit pahnih hawng

Commerce & Industry minister Dr R Lalthangliana chuan nimin khan Zuangtui Industrial Estates-ah Bamboo Processing Factory, Agarbatti Stick Unit pahnih a hawng a, Common Facility Centre building a hawng bawk

Dr R Lalthangliana chuan, agarbatti stick chu industry-in a kawhte zinga dik tak a nia sawiin, "Covid-in min tihbuai avangin kan thil kalpui tur tam tak kan ti thei lo. Vision ṭha tak tak kan nei a, a nih dan tur anga kan kalpui chuan kan ṭangkaipui hle dawn a ni," a ti.

Mizoramah thing a ṭhang chak vak lo tih sawiin R Lalthangliana chuan, "Agarbatti siamna mau hi chu a puitling zung zung mai a, kan vannei dawn hle. Mysore lama khawvela agarbatti siamna lian bera hotute pawh nimin lamah ka titipui a ni. Agarbatti hi Mizoramah mi sing biin eizawn nan kan la hman ka beisei," a ti a; agarbatti hralhnaah harsatna a awm loh tur thu a sawi.

Bamboo Processing Factory hi Bamboo Development Agency-in National Bamboo Mission hnuaia cheng nuai 60 hmangin September 2020 khan an sa ṭan a, agarbatti siamna khawl pariat a awm. Thla khatah round agarbatti stick ton 10.40 siam chhuak thei tura duan a ni a, an siamte chu Ranga Rao & Son, Mysore-te'n an lei dawn a ni.

Common Facility Centre chu Commerce & Industries department hnuaia Handloom Textile & Handicraft Wing-in a enkawl dawn a, electric hmanga la hlûmna leh puan bànnate a awm.