BJP President-in union minister-te kâwm

BJP, Mizoram State president Vanlalhmuaka chuan November 25, Ningani khan sorkar laipuia Railways, Communications, Electronics and Information Technology minister Ashwini Vaishnaw chu a pisaah a kâwm a; Mizorama rél kawng siam mek leh communication lama harsatna awmte sutkian dan tur a sawipui.

Vanlalhmuaka chuan, Mizorama rél kawng siam mek chu a muang lutuk nia sawiin, chak zawka hna thawh a nih theih dan tur leh zawh hun tura tiamah zo ngei tura hma la turin a ngen a; zángnadawmna pek chungchanga harsatna awm mek pawh a rang lama chinfel dan tur ngaihtuah thuai turin a ngen a ni.

Railways minister Ashwini Vaishnaw hian hmarchhaka Railways hotute phone-in a be nghal a, Mizoram BJP thu thlente chu a rang lama chingfel tur leh an hmalak dan a hnena hriattir turin a hrilh nghal tih BJP thuchhuah chuan a tarlang.

Mizoram BJP President hian Ningani zan khan MoS for MSME Bhanu Pratap Singh Verma pawh a hmu bawk a ni.